Грузия Online-ի փոխանցմամբ՝ վրացական ընդդիմության առաջնորդներից, խորհրդարանի նախկին խոսնակ Նինո Բուրջանաձեն երեկ կայացած մամլո ասուլիսի ժամանակ հայտարարել է.
«Ինչ էլ որ նրանք անեն, եթե ես ֆիզիկապես ողջ մնամ, ապա անկախ ամեն ինչից պայքարելու եմ արդարության համար և անպայմանորեն հաղթանակ եմ տանելու։
Իշխանությունները գիտեն, որ չափն անցել են, և ես դա նրանց չեմ ների։ Դուք գիտեք, որ ես այս երկիրը սիրում եմ ձեզանից շատ։ Ես չեմ վախենում քայլել առանց թիկնազորի, չեմ վախենում ֆիզիկական ոչնչացումից ու ձերբակալությունից։
Ինձ ձերբակալե՛ք, և ես բանտից դուրս կգամ որպես հերոս։ Ես ոչինչ չունեմ խոստովանելու»։
Բուրջանաձեն նաև հասարակությանը կոչ է արել չհավատալ ու չդիտել ՆԳՆ-ի մոտ առկա տեսագրությունները, քանի դեռ չի հաստատվել դրանց օրինականությունը։ Բուրջանաձեին նաև հետաքրքրել է, թե ո՞ր իրավունքի համաձայն են իշխանությունները գաղտնալսումներ իրականացրել։
Հիշեցնենք, որ Վրաստանի ՆԳՆ-ն հրապարակել է Բուրջանաձեի ու նրա որդու խոսակցության ձայնագրությունը, որում նրանք հանգում են այն եզրակացության, թե իշխանափոխություն իրականացնելու համար անհրաժեշտ է 30,000 ցուցարար և մոտ 500 զոհ։
