Թուրքական Anadolu գործակալության փոխանցմամբ, Թուրքիայի արտգործնախարար Ահմեդ Դավութօղլուն անդրադարձել է դեպի Գազայի հատված «Ազատության նավատորմ 2»-ի գործուղմանը.
«Հուսով եմ, որ այս անգամ չեն կրկնվի նախորդ տարվա իրադարձությունները: Կարծում ենք, որ ելնելով նախորդ տարվա փորձից՝ Իսրայելն այլևս այդպիսի սխալ չի գործի: Եթե Իսրայելը ցանկանում է, որ նոր «Ազատության նավատորմեր» չառաքվեն Գազա, ապա պետք է ճանաչի պաղեստինյան նոր ղեկավարությունը և վերացնի ծովային շրջափակումը»:
Հիշեցնենք, որ «Ազատության նավատորմ 2»-ի միջազգային ներկայացուցիչները հայտարարել են, որ նոր նավատորմը Գազայի հատված կառաքվի հունիսի վերջին: Մինչ այդ նշվում էր, թե նրանք մտադիր են «Ազատության նավատորմ 2»-ն ուղարկել մայիսի վերջին` նախորդ տարի նույն ժամանակահատվածում գրանցված «Մավի Մարմարա»-ի միջադեպի տարելիցի օրը:
Այդ ժամկետի փոփոխությունը պայմանավորված է հունիսի 12-ին Թուրքիայում կայանալիք խորհրդարանական ընտրություններով, որից առաջ թուրքական իշխանություններին ամենևին էլ պետք չէ լարված իրավիճակների առաջացում:
«Ֆրանս-պրես» գործակալության տեղեկություններով, նոր նավատորմը բաղկացած է լինելու 15-20 նավերից: Այս անգամ ակցիայի կազմակերպիչները մտադիր են Գազա հասցնել շինանյութ և դեղորայք: