1946 թվականից սկսած՝ ամեն տարի Economist ամսագրի Intelligence Unit-ը հրապարակում է տարեկան զեկույց աշխարհի գործարար և քաղաքական դեմքերի մասին` երկրների քաղաքական և տնտեսական կյանքի մասին գաղափար տալու համար։ Ըստ այդմ, այս տարի Economist-ի փորձագետները համարում են, որ «Հայաստանի նախագահ Սերժ Սարգսյանի դիրքերն այժմ առավել ապահով են թվում. տնտեսական իրավիճակը բարելավվել է անցյալ տարի գրանցած 14.4-տոկոսանոց անկումից հետո»:
«Էկոնոմիստ»-ի վերլուծաբաններն անդրադրարձել են նաև քաղաքական ոլորտին։ Լևոն Տեր-Պետրոսյանի առաջնորդած ընդդիմադիր Հայ ազգային կոնգրեսի՝ իշխանությունը փոխելու շանսերը պարբերականի մասնագետները գնահատել են ոչ մեծ։ Ըստ նրանց` ՀԱԿ-ը համախմբված միասնական քաղաքական ծրագիր չունի և կառավարությանը քննադատում է` առանց այլընտրանքային քաղաքականություն առաջարկելու: Այսպիսի գործողությունները հազիվ թե համոզեն հասարակությանը, թե ՀԱԿ-ը կարող է համախմբված ընդդիմադիր ուժ ձևավորել: Բացի այդ Լևոն Տեր-Պետրոսյանի ջանքերը ընդդիմադիր առավել լայն հարթակ ստեղծելու ուղղությամբ` Դաշնակցության և «ժառանգության» հետ միասին, արդյունք չտվեցին:
Պարբերականի փորձագետների գնահատմամբ, նախագահ Սերժ Սարգսյանին հաջողվել է ամրապնդել իշխանությունը քաղաքական և գործարար վերնախավերում»,- ասված է զեկույցում:
Ըստ կանխատեսման` 2012 թվականի խորհրդարանական և 2013-ի նախագահական ընտրություններին, ամենայն հավանականությամբ, նախագահ Սերժ Սարգսյանի գլխավորած Հանրապետական կուսակցությունը «կշարունակի իր գերակայությունը»:
Զեկույցի հեղինակները կարծիք են հայտնում, որ Հանրապետականը ընտրություններում իր դիրքերն ամրապնդելու համար «կօգտագործի վարչական ռեսուրսը, իսկ ընդդիմությունը կրկին դժվարությունների կհանդիպի միասնական ճակատով հանդես գալու անհնարինության պատճառով»: