«Ազգային անվտանգություն» կուսակցության ղեկավար Գառնիկ Իսագուլյանը, գնահատելով հանրապետությունում առկա նախընտրական տրամադրությունները, «Առաջին լրատվական»-ի հետ զրույցում կարծիք հայտնեց, որ բոյկոտի քարոզը չի աշխատելու. «Նրանք բոլորը, ովքեր միշտ ակտիվ են եղել, 4 դաշինք և 5 կուսակցություն հայտարարել են ընտրություններին իրենց մասնակցության մասին»:
Նրա խոսքով՝ շատ կարևոր էր, որ կարողանար ամբողջ ընդդիմությունը միավորվել, մինչդեռ նրանցից յուրաքանչյուրը փորձում է հայտարարել, որ ինքն է միակ ընդդիմադիրը, իսկ մյուսները կա՛մ ղեկավարվում են Բաղրամյան-26-ից, կա՛մ անկախ չեն, կա՛մ հրահանգով են մասնակցում ընտրապայքարին. «Նման մթնոլորտում դժվար է ասել, որ որևէ մեկը կարող է իր ետևից տանել բողոքական զանգվածը»:
Գառնիկ Իսագուլյանը նշեց, որ ընդդիմության ցուցակները և ընտրություններին պատրաստվածությունը ցույց տվեցին, որ իշխող ուժին հակակշիռ դաշինք չստեղծվեց. «Օրինակ՝ «Ծառուկյան» դաշինքի ցուցակները նայելիս պարզվում է՝ մեծ մասը Հանրապետականից դուրս եկածներն են»:
Անդրադառնալով «Օհանյան-Րաֆֆի-Օսկանյան» դաշինքին՝ մեր զրուցակիցը նկատեց. «Թե՛ Օսկանյանը, թե՛ Րաֆֆի Հովհաննիսյանը, թե՛ Օհանյանը ժամանակին եղել են բարձրաստիճան պաշտոնյաներ, և նրանց կատարած գործունեությունը որևէ մեկի համար գաղտնիք չէ: Եվ նրանք հասարակության մեջ առկա հարցադրումներին պետք է պատասխաններ հնչեցնեն… Սամվել Բաբայանը չի էլ թաքցնում, որ ազդեցություն ունի. դա այդ դաշինքի խնդիրն է: Եթե նրանք այդ հնարավորությունը տվել են Սամվել Բաբայանին, ապա ես չեմ կարծում, որ Սամվել Բաբայանը ին չ-որ օրենք է խախտում»:
Գառնիկ Իսագուլյանը, այնուամենայնիվ, կարծում է, որ թեև Սամվել Բաբայանը մեծ ներդրում է ունեցել Ազատամարտի ընթացքում, նաև Արցախի հերոսի կոչում է ստացել, բոլոր դեպքերում այս նախընտրական քարոզչության մեջ լավ կլինի, որ ձեռնպահ մնա՝ հատկապես Արցախի Հանրապետությանը վերաբերող խնդիրները դարձնել Հայաստանի ներքաղաքական պայքարի մեջ արծարծվող հարցեր և դրանց տալ գնահատականներ, որոնք «գոնե իրեն չեն սազում: Նախ և առաջ մարդն ինքը պետք է կարողանա հարգել իր անցյալը և իր անցյալի մեջ էն մարդկանց, ովքեր բավականին մեծ ներդրում են ունեցել, միասին աշխատել են»:
