«Առաջին լրատվական»-ի տեղեկություններով՝ այսօր առավոտյան ժամը 8.00-ին ՀՀ ԱԳ նախկին նախարար, ԲՀԿ խմբակցության պատգամավոր Վարդան Օսկանյանի որդի Արա Օսկանյանը և նրա ընկերը Բաղրամյան պողոտայի վրա գտնվող Music factory բարից դուրս գալուց հետո, երբ նստել են սև «Մերսեդես» մակնիշի ավտոմեքենան, նրանց են մոտեցել քաղաքացիական հագուստով մարդիկ և ենթադրաբար ուղեկցել ոստիկանություն:
«Առաջին լրատվական»-ը ՀՀ ոստիկանության հասարակայնության հետ կապի և լրատվության վարչությունից փորձեց պարզել նշված դեպքի առիթով մանրամասներ և ոստիկանություն տարվածների ինքնությունը, ոստիկանությունը հաստատեց, որ նշված վայրից բերման են ենթարկվել երկու հոգի՝ թմրանյութեր պահելու և օգտագործելու կասկածանքով:
Այլ մանրամասներ ոստիկանությունը հրաժարվեց տրամադրել:
«Առաջին լրատվական»-ին հաջողվեց հեռախոսով զրուցել Վարդան Օսկանյանի կրտսեր որդու՝ Արման Օսկանյանին հետ, ով հայտարարեց, որ «նման բան չի եղել», և որ Արա Օսկանյանն այժմ հանդիպումների է:
