«Վարչապետ Կարեն Կարապետյանը սփյուռքահայերին Հայաստանում ներդրումներ անելու կոչից առաջ պետք է Հայաստանում բանկերի գյամերը քաշի ու օրենսդրական դաշտը կարգավորի, որպեսզի սփյուռքահայ ներդրողները իմ պես միամիտ-միամիտ, զուտ հայրենասիրությունից դրդված, իրենց էությունը մոռացած՝ չգան այստեղ, ներդրում անեն ու հայտնվեն իմ կարգավիճակոմ»,- «Առաջին լրատվական»-ի հետ զրույցում անդրադառնալով վարչապետի կոչին՝ ասաց սնանկացած գործարար Փայլակ Հայրապետյանը։
Նրա խոսքով՝ Հայաստանում ներդրումային մեծ դաշտ կա, հատկապես թեթև արդյունաբերության, շնարարության և մի քանի այլ ոլորտներում, կարելի է հանգիստ գալ և ներդրումներ անել, պարզապես դրսից եկող ներդրողների վստահությունն է պետք, որ իրենց չեն խաբի։ Օրենսդրական դաշտի բարելավում է պետք, օրենքով երաշխիքներ են պետք նրանց։
«Թե չէ՝ պայմաններ կան, լափողներն ու գռփողները աստիճանաբար դուրս են գալիս։ Էս ընտրություններով դաշտն էլ ավելի կմաքրվի, անկուշտները, որ արդեն կշտացել են, կհեռանան դաշտից, ու արդեն կարելի է հանգիստ ներդրում անել։ Էս վարչապետն էլ է կուշտ մարդ, ոչ թե նախորդի պես։ Ուղղակի էս վարչապետը պետք է խելոք գտնվի, նստի ու բանկերի հարցերը լուծի»,- ասաց Հայրապետյանը՝ հավելելով. «Մեր վարչապետը, մեր նախագահը առաջին հերթին բանկերից պետք է սկսեն, քանի որ դրանք թալանում են մարդկանց, սաղ Հայաստանի բնակիչների տները, ոսկեղենը, փողերը տարան։ Մարդիկ մնացել են առանց կոպեկի, առանց տան։ Բանկերը սաղ խլել են։ Բանկերի հարցը շատ կարևոր է։ Բոլորը պետք է հավաքվեն, բանկերի ղեկավարներին կանչեն ասեն՝ էս ինչ եք անում։ Որտեղ եք տեսել նման բարձր տոկոսադրույքներ։ Որտեղ եք տեսել 37 տոկոս տոկոսադրույք։ Դա չլսված բան է։ Կրկնում եմ՝ պետք է բանկերի գյամերը քաշվի, ու ամեն ինչ լավ կլինի»։
Որպես օրինակ Հայրապետյանը մատնացույց է անում «Ամերիաբանկին», որը հենց առաջին մեղավորներից է իր սնանկացման գործում։ «Հիմա դատական պրոցեսով արդեն ապացուցվում է, որ ամենամեղավորը բանկն է եղել։ Ես բարի գործ էի ուզում անել՝ հայրենիքում 10 հազար աշխատատեղ էի ուզում բացել։ Ինձ թվում էր՝ դա իմ կյանքի ամենանվիրական գործը կլինի, բայց ինչ ստացվեց։ Հայրենասիրությունը այս երկրում սուտ կատեգորիա է»,- նկատեց գործարարը՝ հավելելով, որ այն գործարարները, ովքեր վարչապետի կոչից դրդված կուզենան գալ այստեղ ներդրում անելու, առաջին հերթին հենց բանկերի մասով պետք է երաշխիքներ պահանջեն կամ աշխատեն դրսի բանկերի հետ, որպեսզի չհայտնվեն իր կարգավիճակում։
Մեր դիտարկմանը՝ հաշվի առնելով, թե Հայաստանում ովքեր են կանգնած բանկերի հետևում, ովքեր են հայաստանյան բանկերի սեփականատերերը, հնարավոր կլինի՞ բանկերի «գյամերը քաշել», Հայրապետյանը նկատեց։ «Այո, եթե նախագահը, վարչապետը ու մյուս պաշտոնյաները նստեն, բացատրեն, որ էլ այսպես շարունակվել չի լինի։ Պետք է այս թալանին վերջ դրվի, պետք է աշխատել այնպես, ինչպես դրսի բանկերը։ Եթե բացատրեն, որ իրենց աշխատաոճով երկիրը կփոխվի, ապա, ինձ թվում է, հնարավոր կլինի»։
