Ադրբեջանական APA լրատվական գործակալության փոխանցմամբ, Ադրբեջանի նախագահ Իլհամ Ալիևն այսօր ընդունել է Ադրբեջանում Սերբիայի արտակարգ ու լիազոր դեսպան Զորան Վայովիչի հավատարմագրերը:
Հանդիպման ժամանակ ընդգծելով Ադրբեջանում Սերբիայի դեսպանատան բացման կարևորությունը` Ալիևը նշել է, որ լավ հնարավորություններ կան երկու երկրների միջև հարաբերությունների զարգացման համար, որոնք առանց այդ էլ հաջողությամբ ու դինամիկ զարգանում են: Ալիևը նաև կարևորել է միջազգային կառույցների շրջանակներում երկու երկրների ակտիվ համագործակցությունը:
Վայովիչն իր հերթին գոհունակություն է հայտնել Ադրբեջանում Սերբիայի դեսպան նշանակվելու կապակցությամբ` ընդգծելով, որ ջանքեր կգործադրի երկու երկրների միջև հարաբերություններն առավել ամրագրելու համար:
Հիշեցնենք, որ Ադրբեջանում Սերբիայի դեսպանատունը բացվել է այս տարվա մարտին, սակայն ցայժմ դեսպան չուներ, և Ադրբեջանում Սերբիան ներկայացնում էր ժամանակավոր լիազոր անձը:
Ի դեպ, մայիսի սկզբին Սերբիա էր այցելել Ադրբեջանի արտգործնախարար Էլմար Մամեդյարովը: Նրա այցի արդյունքում հայտնի դարձավ, որ Ադրբեջանի նախագահ Իլհամ Ալիևը հունիսի 8-9-ը այցելելու է Սերբիա:
