Ազգային ժողովի ԲՀԿ խմբակցության ղեկավար Նաիրա Զոհրաբյանը հաստատում է, որ Արարատի մարզի Սայաթ-Նովա համայնքի ԲՀԿ տարածքային կառույցի անդամին դանակահարել է Մասիսում ՀՀԿ-ական թեկնածուներից մեկի նախընտրական շտաբի ակտիվիստը: Ազգային ժողովում լրագրողների հետ զրույցում Նաիրա Զոհրաբյանը հայտնեց, որ ԲՀԿ-ականը բավականին լուրջ վնասվածք է ստացել: «Նա որովայնի հատվածում 4 տեղից ծակող վնասվածքներ է ստացել: Նրան Էրեբունի հիվանդանոցում տևական ժամանակ վիրահատել են: Այսօր առավոտյան նրա վիճակն արդեն կայունացել է, բայց, ցավոք, սա դեռ միայն ծաղիկներն են»,- նշեց Զոհրաբյանը:
Նա հիշեցրեց, որ իրենք բազմիցս զգուշացրել են, որ ռեյտինգային ընտրակարգն իր մեջ լուրջ վտանգներ է պարունակում՝ ընտրական պայքարը գլադիատորների, ցլամարտի դաշտ տեղափոխելու իմաստով. «Ապրիլի 2-ով կյանքը չի ավարտվելու, դա պիտի հասկանանք բոլորս և նրանք, ում համար մեկ քվեն ավելին արժե, քան մարդու կյանքը: Շատ մեծ է վտանգը, որ ռեյտինգային համակարգի դեպքում ընտրապայքարը քաղաքական դաշտից կարող են տեղափոխել կրիմինալի, «բեսպրեդելի» և միջանձնային հարաբերությունների դաշտ և վերածել գլադիատորական մարտերի, ցլամարտի»։
«Ես հորդորում եմ բոլոր քաղաքական ուժերին, հատկապես տեղերում իրենց ամենակարող համարող թեկնածուներին՝ դուք լավություն չեք անում անգամ ձեր կուսակցությանը, որովհետև այս ամենը արձանագրվում է միջազգային դիտորդական առաքելությունների կողմից, և դրանով դուք ստվերում եք ձեր կուսակցության հեղինակությունը և կոչերը ազատ ու թափանցիկ ընտրություններ անցկացնելու մասին»- ասաց պատգամավորը:
Մանրամասները՝ տեսանյութում:
