Թուրքիայի իշխանությունները կարող են փակել Ինջիրլիք ավիաբազան ամերիկացի զինվորականների համար, եթե Վաշինգտոնը համագործակցի քրդական «Ժողովրդական ինքնապաշտպանության ջոկատների» (YPG) և «Ժողովրդավարական միության» (PYD) հետ՝ սիրիական Ռաքքայում ԴԱԻՇ ահաբեկչական խմբավորման գրոհայինների դեմ պայքարի շրջանակներում: Այս մասին հաղորդում է Yeni Safak պարբերականը՝ վկայակոչելով իր աղբյուրին:
Աղբյուրի տվյալներով՝ Անկարան քննարկում է նաև ԱՄՆ-ի ավիացիայի համար օդային տարածքը փակելու հնարավորությունը:
Միևնույն ժամանակ Թուրքիայի ներկայացուցիչները Վաշինգտոնի հետ բանակցությունների ժամանակ հայտարարել են, որ դեմ չեն լինի, որպեսզի օպերցիային մասնակցի «Սիրիական ազատ բանակը», ինչպես նաև արաբ և քուրդ բնակչությունը, որոնք ապրում են քաղաքում:
Ինջիրլիք ավիաբազան օգտագործվում է Թուրքիայի և ԱՄՆ-ի ռազմաօդային ուժերի համար, գործունեությունը կարգավորվում է երկու երկրների միջև ռազմական և տնտեսական համագործակցության մասին պայմանագրով: Ավիաբազայում տեղակայված են մի շարք երկրների ինքնաթիռներ, որոնք անդամակցում են միջազգային կոալիցիային:
