Ամերիկյան կողմը հաստատում է, որ Սպիտակ տան ղեկավար Դոնալդ Թրամփի և ՌԴ նախագահ Վլադիմիր Պուտինի միջև հանդիպման նախապատրաստություն ներկայում չի կատարվում։ Այս մասին հայտնում է The Wall Street Journal-ը՝ հղում անելով ԱՄՆ իշխանությունների անանուն ներկայացուցչին։
Պարբերականն իր նյութում մեջբերում է ՌԴ փոխարտգործնախարար Սերգեյ Ռյաբկովի խոսքերը, ով ասել էր, որ ընթանում է երկու երկրների ղեկավարների միջև հանդիպման անցկացման գործնական նախապատրաստություն, սակայն հանդիպման ժամկետի և վայրի վերաբերյալ ըմբռնում չկա։
«ԱՄՆ բարձրաստիճան ներկայացուցիչը հայտնել է, որ Թրամփի և Պուտինի միջև հանդիպման նախապատրաստություն չի կատարվում»,-նշվում է պարբերականի նյութում։
Երեքշաբթի Ռյաբկովը, ելույթ ունենալով Պետդումայում կլոր սեղանի շուրջ, որը նվիրված է եղել ռուս-ամերիկյան հարաբերություններին, մեկնաբանել է Բոննում ՌԴ արտգործնախարար Սերգեյ Լավրովի և ԱՄՆ պետքարտուղար Ռեքս Թիլերսոնի հանդիպումը։ Ռյաբկովը նշել է, որ դիվանագիտական գերատեսչությունների ղեկավարները քննարկել են երկու երկրների հարաբերությունների հարցերը, ինչպես նաև ծրագրվող երկկողմ շփումները, այդ թվում երկու երկրների նախագահների առաջին անձնական հանդիպման նախապատրաստությունը։
