ՀՀ ԱԺ «Բաց դռներ» ծրագրի շրջանակում փետրվարի 27-ին խորհրդարան են այցելել ԵՊՀ ժուռնալիստիկայի ֆակուլտետի դասախոսները եւ ուսանողները: Հյուրերը նախ ներկա են գտնվել ԱԺ նիստին, որից հետո ավանդական բաց դասի շրջանակում նրանց հետ հանդիպել է ՀՀ ԱԺ փոխնախագահ Էդուարդ Շարմազանովը:
Բաց դասն ԱԺ փոխնախագահի առաջարկով ընթացել է հարցուպատասխանի ձեւաչափում: Ուսանողների հետ անկեղծ զրույցի ժամանակ պարոն Շարմազանովն իր տեսակետն է հայտնել մեր երկրի ներքին եւ արտաքին քաղաքական բազմաթիվ խնդիրների, հասարակական-քաղաքական տարբեր երեւույթների վերաբերյալ:
Էդուարդ Շարմազանովն անդրադարձել է հայ ժողովրդի անկախության կերտման դժվարին ուղուն եւ ընդգծել, որ պատմական տարբեր ժամանակներում հայ ժողովրդի հաջողության գրավականը մշտապես եղել է համայն հայության միասնությունը:
Ինչպես տեղեկացրին ՀՀ ԱԺ փոխնախագահ Էդուարդ Շարմազանովի աշխատակազմից, ՀՀ ԱԺ փոխնախագահն անդրադարձել է մեր երկրում առաջիկայում կայանալիք խորհրդարանական ընտրություններին՝ նշելով. «Ցանկացած ընտրությունից մեր պետությունը պետք է ավելի ուժեղացած դուրս գա: Մեզ կայուն եւ ուժեÕ ² հայրենիք է պետք, որտեղ պետք է լինի քննադատություն ու բազմակարծություն, բայց ոչ երբեք ատելություն»:
Պարոն Շարմազանովն ուսանողների խնդրանքով խոսել է նաեւ Արցախում անցկացված սահմանադրական հանրաքվեի, ջավախահայության եւ վիրահայության խնդիրների, արտերկրում հայկական եկեղեցիների պահպանության եւ այդ հարցում պետական մարմինների քայլերի մասին:
