Երեկ «Երկիր մեդիա» հեռուստաընկերության հասարակական-քաղաքական հաղորդումների պատասխանատու Գեղամ Մանուկյանը ֆեյսբուքյան իր էջում գրել էր, թե ԱԺ պատգամավոր, ՀՀԿ-ի կողմից առաջադրված Բազմասեր Առաքելյանը մարդ է ծեծել: Գեղամ Մանուկյանը, մասնավորապես, գրել էր. «ԲՀԿ-ից փախած պատգամավոր Բազմասեր Առաքելյանը, ով Հայաստանի Հանրապետական կուսակցության ռեյտինգային ցուցակով Արագածոտնի մարզից մասնակցում է 2017-ի ապրիլին կայանալիք ԱԺ ընտրություններին, այսօր ծեծուջարդ է նախաձեռնել իր հայրենի Փարպի գյուղում։ Ընդ որում, ի տարբերություն այլ նման միջադեպերի՝ ապականել է «օջախ» հասկացությունը, որը սրբություն է համարվում մեր ժողովրդի համար։ Թեկնածուի մի քանի տասնակ կողմնակիցները Բազմասեր Առաքելյանի տուն են հրավիրել համագյուղացիներից մեկին, ու տեղեկանալով, որ նա, ի տարբերություն պարբերաբար կուսակցություն փոխած Բազմասերի, քվեարկելու է Դաշնակցության օգտին, դաժան ծեծի են ենթարկել նրան, ում արդեն տեղափոխել են հիվանդանոց։ Չբավարարվելով դրանով, բացի կուսակցական ճամբարներ փոխելուց՝ խորհրդարանում որևէ բանով աչքի չընկած մարզիկ-պատգամավորն ու կողմնակիցները հարձակվել են նաև տուժածի եղբոր վրա։ Սակայն այս անգամ անազնիվ մի քանի տասնյակով մեկի դեմ տարբերակը չի գործել, ու նրանք պատասխան են ստացել։ Վիճակը լարված է: Դաշնակցականներն էլ հայտարարում են՝ իրենց ցանկացած ՀԱՄԱԿԻՐ ու կուսակցական ԸՆԿԵՐ անպաշտպան չի մնա։ Բազմասերն էլ իր այդքան «կարոտած» ծեծն անպայման կստանա»:
ՀՀ Արագածոտնի մարզի դատախազի կողմից միջադեպի վերաբերյալ հրապարակումները ուղարկվել են ՀՀ ոստիկանության Աշտարակի բաժին՝ ՀՀ քրեական դատավարության օրենսգրքի 180-181-րդ հոդվածներով նյութեր նախապատրաստելու համար:
«Առաջին լրատվական»-ի հետ զրույցում Բազմասեր Առաքելյանը նշեց, որ այս ամենն արվում է մարզում իր վարկանիշի վրա սև գիծ թողնելու նպատակով: «Ես քաշկռտոց արել եմ, երբ մարզիկ եմ եղել: Դա եղել է տասը տարի առաջ ռինգում՝ ըմբշամարտի գորգում: Ես ինձ ո՞նց թույլ կտամ իմ տուն մարդ կանչեմ, մարդ ծեծեմ… իմ տուն էնքա՜ն մարդիկ կան, որ միայն գալիս են աղ ու հաց կիսելու համար: Սա ընդամենը մարդիկ խուճապի մեջ են, դրա համար նման բաներ են գրում»,- ասաց Բազմասեր Առաքելյանը:
Մեր դիտարկմանը, որ արդեն դատախազությունը նյութեր է նախապատրաստում, Բազմասեր Առաքելյանը նշեց. «Անձամբ ես ոչ մի դաշնակցականի, ոչ մի մարդու հետ չեմ հանդիպել, չեմ խոսացել: Ոչ մի քաշկռտուքի ներկա չեմ եղել, բացարձակ: Զարմանում եմ ուղղակի: Նախընտրական կրքեր են, մեկի վարկանիշը մի քիչ բարձր, մեկինը՝ մի քիչ ցածր… չգիտեմ, նախընտրական կրքեր են, հնարավոր է՝ դրանից ինչ-որ բան եզրակացրել գրել են, չգիտեմ: Կոնկրետ իմ անձի հետ կապված՝ որևէ մեկի հետ քաշկռտուք կամ լեզվակռիվ, որևէ բան չի եղել, և ես չգիտեմ՝ ինչու են նման բան անում»:
Անդրադառնալով իր հասցեին հնչած մեղադրանքներին՝ Բազմասեր Առաքելյանը նշեց. «Ես չգիտեմ՝ ով է ինձ մեղադրում, ես մեղադրողի կարգավիճակում չեմ, բայց ոչ էլ մեղադրվողի, դրանք ընդամենը ասեկոսեներ են, որոնք իրականությանը չեն համապատասխանում»:
Նրա խոսքով՝ ժողովուրդը սադրանքների չի ենթարկվի, չնայած ամեն ինչ փորձում են անել, որ ընտրությունների արդյունքների վրա ազդեցություն ունենան:
