Առաջիկա խորհրդարանական ընտրություններում Արարատի մարզը խոստանում է ամենաթեժ կետերից մեկը դառնալ։ Այստեղ ընտրապայքարը թեժ է, հատկապես մարզում առաջադրված ՀՀԿ-ական թեկնածուների միջև։ Արտաշատում հատկապես ակտիվ են ՀՀԿ մարզային կառույցի ղեկավար Ալիկ Սարգսյանն ու Արայիկ Գրիգորյանը, որոնց դեմ իր հերթին պայքարում է Արտաշատի քաղաքապետ, ԲՀԿ-ից առաջադրված Արգամ Աբրահամյանը։ Նա այս օրերին ակտիվորեն զբաղված է արտաշատցիներին ու հարակից գուղի բնակիչներին վառելափայտ բաժանելով։ Դրամական խոստումներ ևս տրվում են՝ 10-20 հազար դրամի սահմաններում։ Մասիսում մրցակցությունը կրկին ՀՀԿ թեկնածուների միջև է։ Գործող քաղաքապետ Թույների Մհերի որդին՝ Դավիթ Համբարձումյանը, ով նաև ոստիկանապետ Վլադիմիր Գասպարյանի անվտանգության պետ Արշակ Հակոբյանի փեսան է, ակտիվորեն աշխատում է Մուրադ Մուրադյանի համար, քանի որ անցած տարի վերջինս հենց նրա շնորհիվ դարձավ քաղաքապետ։ Իսկ Մասիսի նախկին քաղաքապետ Սաշա Հակոբյանը, ով իր աթոռը զիջեց Դավիթ Համբարձումյանին, աշխատում է Արայիկ Գրիգորյանի համար՝ թեև «Առաջին լրատվական»-ի հետ զրույցում ասաց, որ Ալիկ Սերգեյիչն էլ է իր մտերիմ ընկերը և ինքը երկար ժամանակ մտածում էր՝ ում սատարեր։
-Այո, ես որոշել եմ սատարել Արայիկ Գրիգորյանին։ Երբ օրը, ժամը կգա, կսկսեմ աշխատանքները։ Բայց հիմա ես ոչ շտաբ եմ բացել, ոչ մի այլ բան։ Ես տանը նստած սպասում եմ քարոզարշավի մեկնարկին։
–Պարոն Հակոբյան, իսկ ինչո՞ւ որոշում կայացրեցիք սատարել հենց Արայիկ Գրիգորյանին, ՀՀԿ-ն երեք թեկնածու ունի մարզում։
-Իմ ընկերն է Գրիգորյան Արայիկը։ Բայց Ալիկ Սարգսյանը ևս իմ ընկերն է։ Ես ոչ մի վատ բան չեմ տեսնում Գրիգորյանին սատարելու մեջ, քանի որ վսահ եմ՝ Ալիկ Սարգսյանը ինձնից չի նեղանա, քանի որ մենք ընդհանուր մի գործ ենք անում։ Ձայները վերջին հաշվով գնալու են ՀՀԿ-ին։
–Ձեր կարծիքով՝ ՀՀԿ թեկնածունե՞րն են խանգարում մեկը մյուսին։ Դեռ քարոզարշավը չսկսած արդեն լարվածություն կա։
-Չկա նման բան։ Ոչ մեկը ոչ մեկին չի խանգարի։ Իրենց մեջ շատ բարիդրացիական հարաբերություններ կան։ Իրենք բոլորը ամեն օր հանդիպում են իրար հետ։ Շատ լավ տրամադրված եմ։ Ոչ մեկ մյուսի հետևից վատ բան չի խոսում։ Ամեն մարդ իր աշխատանքը կկատարի։ Ի վերջո, դա վերջոմ դառնալու է ընդհանուր գործ։ Ձայները կգնան կգումարվեն ՀՀԿ-ի ձայներին։
–Արայիկ Գրիգորյանին զուտ ընկերական հարաբերությունների համա՞ր եք սատարում, թե՞ պաշտոնի հավակնություն ունեք։
-Ես ադեն ասացի, որ ես կամ Ալիկ Սարգսյանին պետք է սատարեի, կամ Արայիկ Գրիգորյանին։ Բայց իմ ընկերները շատ խնդրեցին, որ կանգնեմ Արայիկ Գրիգորյանի կողքը։ Ես էլ իմ ընկերների խնդրանքը չմերժեցի։ Այլ պատճառ չկա։
-Մուրադ Մուրադյանին չեք սատարում, քանի որ նրան սատարում է գործող քաղաքապե՞տը։
-Ոչ։ Մուրադ Մուրադյանի կողքին մեծ ուժ կա կանգնած։ Նա քիչ ձայներ չի տանելու մեր տարածքից ու ամբողջ մարզից։
-Մեծ ուժ ասելով՝ նկատի ունեք քաղաքապետի՞ն։
-Ոչ։ Մի անձով չի կարելի նման արտահայտություն անել։ Բայց ես ոչ մի խնդիր չունեմ ոչ քաղաքապետի, ոչ Մուրադ Մուրադյանի հետ։ Բայց ամենաշատ ձայները մեր մոտից հենց Մուրադ Մուրադյանն է տանելու, քանի որ ամենամեծ թիմը հենց նրանն է։
