Գերմանիան ցանկանում է, որպեսզի Վաշինգտոնն ու Մոսկվան ուղիղ բանակցություններ անցկացնեն միջուկային զինաթափման մասին։ Ի պատասխան Դոնալդ Թրամփի՝ ԱՄՆ-ի միջուկային զինանոցն ընդլայնելու մտադրության մասին հայտարարության՝ Բեռլինը կոչ է արել Վաշինգտոնին ու Մոսկվային ուղիղ բանակցություններ սկսել զինաթափման մասին։
«Մեր ցանկությունն ու կոչը՝ ուղղված երկու խոշոր ատոմային տերություններին, այն է, որպեսզի նրանք շարունակեն երկխոսությունը միմյանց հետ»,-հայտարարել է Գերմանիայի ԱԳՆ ներկայացուցիչը։
Նրա խոսքով՝ լավ կլինի, եթե շփումները տեղի ունենան ոչ միայն Twitter-ով կամ հարցազրույցի միջոցով, այլ ուղիղ, քանի որ գործը վերաբերվում է Եվրոպայի և աշխարհի անվտանգության շատ կարևոր հարցերի։
Ավելի վաղ Reuters-ի հետ հարցազրույցում Թրամփը հայտարարել էր, որ ԱՄՆ-ը պետք է ընդլայնի իր միջուկային զինանոցը՝ գտնվելու այդ ոլորտում առաջատար դիրքերում։