Փոխոստիկանապետ Վարդան Եղիազարյանն այսօր կառավարության նիստում ներկայացրեց ճանապարհային ոստիկանության բարեփոխումների ծրագրին հավանություն տալու մասին հարցը:
Նախագծում ներկայացվում են ճանապարհային ոստիկանության համակարգի խնդիրները, իրականացվելիք բարեփոխումների հիմնական ուղղությունները:
Դրանք են` վարչական իրավախախտումների վերաբերյալ գործերի վարույթների իրականացում, որոշումների կայացում, վարչական տույժերի կատարում, օպերատիվ կառավարման կենտրոն, ճանապարհային պատահարների գրանցում և այլն: Նախատեսված է բարեփոխումներին ուղղված 24 միջոցառում:
Վարչապետի հարցին, թե քաղաքացիների համար ի՞նչն է փոխվելու, Եղիազարյանն նշեց, որ թեթևացնելու են վարչական բեռը, պարզեցվելու են ոլորտի շատ գործողություններ:
Կարեն Կարապետյանը խնդրեց հստակեցնել, թե ի՞նչ նկատի ունեն` ասելով, որ վարչական բեռն են թեթևացնելու: Փոխոստիկանապետը նշեց, որ նախկին տուգանքների մասով, երբ 50 տոկոս ավելացում էր նախատեսված, դա նվազեցվում է 2 անգամ` դառնալով 25 տոկոս:
Կարեն Կարապետյանը հարցրեց. «Հիմա երկու անգամ նվազեցնո՞ւմ եք, թե՞ հանում եք»:
«Հանում ենք, հանում ենք, պարո՛ն վարչապետ»,- նշեց Եղիազարյանը, Կարեն Կարապետյանն արձագանքեց. «Ոնց որ սրտով չեք հանում, ոնց որ ցանկանալով չեք հանում»:
Մանրամասները՝ տեսանյութում:
