ՀՀ արտակարգ իրավիճակների նախարարության կողմից իրականացվող «Քլոր տեղափոխող ավտոմեքենայի վթարի դեպքում հակազդման գործողությունների իրականացումը» թեմայով փետրվարի 21-ին կայացած շտաբային ուսումնավարժությունը ներկա էր ՀՀ ԱԻ նախարար Դավիթ Տոնոյանը:
ՀՀ արտակարգ իրավիճակների նախարարությունից տեղեկացնում են, որ շտաբային ուսումնավարժությունը ղեկավարում էր ՀՀ ԻՆ Փրկարար ծառայության տնօրեն, փ/ծ գնդապետ Մուշեղ Ղազարյանը. միջոցառմանը որպես դիտորդ մասնակցում էին ԵՄ քիմիական, կենսաբանական, ճառագայթային և միջուկային (ՔԿՃՄ) Գերազանցությունների կենտրոնի ներկայացուցիչներ Զբիգնև Կրասնոդեբսկին ու Քաթրին Վանդերստինը, ինչպես նաև՝ ՀՀ տարբեր գերատեսչությունների, ԱԻ նախարարության մարզային փրկարար վարչությունների, և այլ շահառու կառույցների ներկայացուցիչներ:
Նախարար Տոնոյանը, ողջունելով ներկաներին, կարևորել է միջազգային դիտորդների մասնակցությունը՝ հույս հայտնելով, որ դիտորդները բացի մասնակցությունից կունենան նաև իրենց ներդրումը Հայաստանում ոլորտի զարգացման մեջ: Նա ասել է, որ շտաբային ուսումնավարժանքը հնարավորություն կտա քլորի անվտանգ տեղափոխման առկա խնդիրները հետագայում ՀՀ Կառավարությանը ներկայացնելու համար:
Նախարարն ընդգծել է, որ նորմատիվային բազայի արդիականացումն այսօր հրատապ լուծում պահանջող կարևոր խնդիրներից է:
Ուսումնավարժության ընթացքում խաղարկվել են քիմիական օբյեկտների վթարի կամ քիմիական վտանգի դեպքում բնակչության պաշտպանության պլանը, ինչպես նաև՝ քիմիական վտանգավոր օբյեկտում վթարի դեպքում վթարավերականգնողական գործողությունների համար նախատեսված պլանները և շահագրգիռ մարմինների գործառույթների իրականացումը:
Շտաբային ուսումնավարժությանը մոտ ապագայում կլրացնի նաև դաշտային ուսումնվարժության անցկացումը, որը հնարավորություն կտա շահագրգիռ ուժերին գործնականում ստուգելու և զարգացնելու իրենց կարողությունները:
