Մոսկվան և Պեկինը կարող են պայմանավորվածություն ձեռք բերել Չինաստանում Superjet-100 ռուսական ինքնաթիռների համար բաղադրիչ մասերի արտադրության շուրջ: Այս մասին հաղորդում է «Վեդոմոստի»-ն՝ վկայակոչելով SSJ ինքնաթիռներ արտադրող «Սուխովի քաղաքացիական ինքնաթիռներ» ընկերության թոփ-մենեջերին և ընկերությանը մոտ կանգնած աղբյուրին:
Թոփ-մենեջերի խոսքերով՝ Չինաստանի շուկան ամենաարագ աճողն է, և նրան անհրաժեշտ են ներքին չվերթների համար նախատեսված ինքնաթիռներ: Նրա խոսքերով՝ ներկայում չինական ավիաարդյունաբերությունը դեռևս չի արտադրում սեփական մշակման Advanced Regional Jet ներքին չվերթներ իրականացնող ինքնաթիռներ, այդ պատճառով SSJ-ն կկարողանա զբաղեցնել շուկայի դատարկ տեղը:
Միևնույն ժամանակ ընկերության ներկայացուցիչը հայտարարել է, որ Չինաստան արտասահմանյան տեխնիկայի ներմուծման արտոնագրերը շատ քիչ են և կազմում են տարեկան ընդամենը 3-5 ինքնաթիռ՝ յուրաքանչյուր ավիաընկերության համար:
Ռուսական կողմի ներկայացուցիչը հայտարարել է, որ դեռևս վաղ է խոսել այն մասին, թե ինչ մասեր կարող են արտադրվել Չինաստանում, և միևնույն ժամանակ հիշեցրել է, որ այնտեղ արտադրվում են Airbus-ի մասեր: Մեկ այլ աղբյուր իր հերթին հայտարարել է, որ Չինաստանի հետ համագործակցության համաձայնագիրը կարող է կնքվել արդեն ՄԱԿՍ-2013-ում, սակայն բանակցությունները բարդ են ընթանում, քանի որ շատ նրբություններ կան:
