Քաղաքացիական ակտիվիստ Եղիա Ներսիսյանն իր դատական նիստից առաջ հանդես եկավ հայտարարությամբ: Նա նշեց, որ Կոմիտաս 5-ի իրադարձությունների ժամանակ երբ լարված ամենառաջին օրն ինքը բերման է ենթարկվել Արաբկիրի ոստիկանություն, այնտեղ իրեն և իր ընտանիքին սպառնացել է Արաբկիրի ոստիկանապետ Գրիշա Ամիրխանյանը:
Եղիա Ներսիսյանի խոսքերով՝ իրեն առանց հիմնավորման են բերման ենթարկել, պարզապես լուսարձակի մոտ է կանգնած եղել, իրեն մոտեցել է փոխգնդապետ Արայիկ Պետրոսյանը, ապա սպիտակ վերանաշապիկով մի մարդ, և բերման են ենթարկել ոստիկանություն: Հետագայում պարզվել է, որ այդ սպիտակ վերնաշապիկովն Ամիրխանյանն է: Ըստ Եղիա Ներսիսյանի՝ Ամիրխանյանն իրեն հայհոյել է, սպառնացել իր ընտանիքին, այդ իսկ պատճառով ակտիվիստը լրագրողներին տեղեկացրեց, որ եթե իրեն և իր ընտանիքին մի բան պատահի, մեղավորը կլինի Ամիրխանյանը:
Ոստիկանությունում, ակտիվիստի պնդմամբ, իրեն «ձեռ են առել»՝ սկսած հագուկապից, վերջացրած քաղաքացիական պայքարից: Եղիան նաև նշում է, որ իրեն ասել են, թե ինքն այդ ամենի կազմակերպիչն է, սակայն նրա հավաստմամբ՝ ինքը չէր կարող լինել Կոմիտասում ծավալված իրադարձությունների կազմակերպիչը, քանի որ երբ ինքը գտնվել է ոստիկանությունում, Կոմիտասում իրավիճակը շարունակել է լարված մնալ:
«Առաջին լրատվական»-ը հետաքրքրվեց, թե ինչու է միայն երեք օր անց Եղիան նման հայտարարություն անում, ինչին նա պատասխանեց, որ ոչ աշխատանքային օրեր էին։
Լուսանկարը` PanARMENIAN Photo-ի
