Ադրբեջանական Trend գործակալությանը տված հարցազրույցի ժամանակ արտաքին քաղաքականության գերմանական խորհրդի Ռուսաստանի և Եվրասիայի ծրագրերի ղեկավար Ալեքսանդր Ռարն անդրադարձ է կատարել վրաստանյան վերջին զարգացումներին.
«Դեռևս դժվար է ասել, թե վրացական ընդդիմությունը կարո՞ղ է իր բողոքի ակցիաների արյդունքում երկրում հասնել որևէ լուրջ քաղաքական փոփոխության, թե՞ ոչ: Այդ ակցիաները մեծ անակնկալ էին, քանի որ Արևմուտքի աչքում Վրաստանը դիտվում էր որպես քիչ թե շատ կայուն երկիր:
Եթե նայենք թվերին, ապա կտեսնենք, որ Վրաստանը մեծ հաջողություններ է արձանագրել կոռուպցիայի դեմ պայքարի, սոցիալական ճգնաժամերի հաղթահարման ու ներդրումների գրավչության ոլորտներում:
Ամենայն հավանականությամբ, ներկայիս բողոքի ակցիաները պայմանավորված են միջին և առավել ցածր դասի դժգոհությամբ: Հակառակ դեպքում ընդդիմությանը չէր հաջողվի բողոքի ակցիաներ կազմակերպել:
Սա խոսում է այն մասին, որ կառավարությանը դեռևս չի հաջողվել լուծել այն խնդիրը, որը վերաբերում է հարուստների և աղքատների միջև ձևավորված մեծ անդունդին: Բացի այդ, Վրաստանն ամբողջությամբ չի հաղթահարել ֆինանսական ճգնաժամի հետևանքները»:
Հիշեցնենք, որ մայիսի սկզբին Ռարը հայտարարել էր, որ Վրաստանում չպետք է հեղափոխություն ակնկալել, քանի որ Վրաստանը տնտեսական մեծ հաջողություններ է արձանագրել, ինչն էլ մարդկանց համախմբում է նախագահ Միխեիլ Սաակաշվիլիի ճամբարում: Ռարը նաև նշել էր, որ ընդդիմության գլխավոր խնդիրը միացյալ առաջնորդ չունենալն է: