Հայաստանի Հանրապետության Փաստաբանների պալատի նախագահի 14.09.2013 թ. ընտրություններին մասնակցելու համար օգոստոսի 23-ի դրությամբ ինքնառաջադրվել և առաջադրվել են չորս թեկնածուներ: «Առաջին լրատվական»-ի զրուցակիցն է ինքնառաջադրված թեկնածու Կրոմվել Գրիգորյանը:
– Պարոն Գրիգորյան, ինչպես կգնահատեք նախորդ տարիներին Փաստաբանների պալատի աշխատանքը:
– Աշխատանքները, կարելի է ասել, բավարար են: Բավական լուրջ աշխատանքներ կան անելու: «Լավ» կամ «գերազանց» գնահատելու համար թերությունները բազմաթիվ են:
– Այդ թերություններից մեկ-երկուսը կնշե՞ք, ամենաակնառուները:
– Ամենաակնառուներից կնշեմ, օրինակ, այն, որ փաստաբաններն այսօր պալատի կողմից պաշտպանված չեն ցանկացած նախաքննության մարմնից: Եթե անհրաժեշտ լինի, նրանք պալատի միջոցով կարող են պատժվել: Եթե, ասենք, նախաքննության մարմինը չկարողանա ինչ-որ ձևով պատժել փաստաբանին, ապա պալատի միջոցով վերջինիս պատժելը նրանց հաջողվում է:
– Փաստաբաններից մեկը կարծիք հայտնեց, որ պալատի նախագահի պաշտոնը մասնագիտականի զոհաբերում է պահանջում: Համաձա՞յն եք այդ կարծիքի հետ և արդյոք պատրա՞ստ եք նման զոհաբերության:
– Հաշվի առնելով, որ բավական մեծ ժամանակ է պետք պալատի թերությունները վերացնելու համար, բնական է` արդեն մասնագիտական քո կարողությունները կգնան հետին պլան, որովհետև ոչ թե քո կամ քո գրասենյակի շահերի մասին պետք է մտածես, այլ ընդհանուր բոլոր փաստաբանների` անկախ նրանից` տվյալ փաստաբանն ընտրության ժամանակ քո օգտի՞ն է քվեարկել, թե՞ ոչ:
– Նախընտրական քարոզարշավն արդեն մեկնարկել է: Ինչպե՞ս եք այն անցկացնելու:
– Հիմնականում հանդիպում կունենամ հենց տեղերում` փաստաբանների հետ, կփորձեմ իմանալ նրանց հուզող, ցավոտ հարցերը, ընդհանուր քննարկումներ իրականացնել և լուծումներ գտնել, որ հետագայում, ասենք, ընտրության պարագայում դրանք պետք է իրագործվեն:
– Ընտրվելու դեպքում որո՞նք կլինեն առաջնահերթությունները:
– Առաջնային խնդիրներ շատ կան, նախ` կպաշտպանեի փաստաբաններին, որպեսզի նախաքննության մարմինների անհիմն դիմումների հիման վրա պատասխանատվության չենթարկվեն: Կվերացնեի օտարներ-յուրայիններ բաժանումը, որն ութ տարիների ընթացքում արմատացել է: Այսինքն` օրական լուծման առարկա կդարձնեի փաստաբանին հուզող ցանկացած հարց, որպեսզի խնդիր ունենալու դեպքում որևէ փաստաբան ոչ թե խուսափի պալատին դիմել՝ մտածելով` որևէ օգնություն չի ստանալու, այլ հակառակը` ցանկացած դեպքում դիմի` համոզված լինելով, որ պարտավոր է դիմել և օգնություն անպատճառ կստանա:
– Կցանկանայի գնահատեիք ընտրապայքարի մասնակիցների շանսերը:
– Կարծում եմ` դեռ վաղ է այդ մասին խոսելը: Բոլոր մրցակիցներին ես հարգում եմ: Պետք է փորձենք այս աշխատանքն իրականացնել` առանց մեկմեկու վիրավորելու կամ որևէ վնաս պատճառելու:
