Ինչպես այսօր գրում է «Ասպարէզը», մեջբերելով Wikileaks կայքում հրապարակված ամերիկյան դիվանագիտական հերթական փաստաթղթից, 2007 թ. ԱՄՆ պետքարտուղարի տեղակալի օգնական Մեթյու Բրայզան (այս պահին Բրայզան Բաքվում ԱՄՆ դեսպանն է.– 1in.am) հայտարարել է, որ ԱՄՆ պետքարտուղարությունն ամեն ինչ անում է, որպեսզի Հայոց ցեղասպանության բանաձևը չանցնի ԱՄՆ Կոնգրեսում:
Այս մասին Բրայզան ասել է 2007 թ. մարտի 9-ին Ստամբուլում տեղի նահանգապետի՝ փոքրամասնությունների հարցերով տեղակալ Ֆիքրեթ Քափաօղլուի հետ հանդիպման ժամանակ: Այս հանդիպումը տեղի է ունեցել հենց այն օրերին, երբ ԱՄՆ Կոնգրեսի Ներկայացուցիչների պալատում քննարկվում էր Հայոց ցեղասպանության ճանաչման բանաձևը:
Բրայզան շեշտել է, որ վարչակազմը մեծ ջանքեր է գորածադրում, որպեսզի այդ բանաձևը չանցնի ո՛չ Ներկայացուցիչների պալատում և ո՛չ էլ Սենատում: ԱՄՆ վարչակազմը, ըստ Բրայզայի, ցանկանում է, որպեսզի հայ-թուրքական պատմությունը քննարկվի հասարակությունների կողմից:
Իր հերթին Քափաօղլուն ասել է, որ անհրաժեշտ է այս հարցում շեշտը դնել մի քանի կետերի վրա.
– Ստամբուլը այլ մշակույթների հանդեպ միշտ էլ անհանդուրժողականության ավանդույթներ է ունեցել, և սա գալիս է օսմանայն ժամանակաշրջանից:
– Չնայած Հայաստանի և Թուրքիայի միջև անցյալում և արդի փուլում գոյություն ունեցող լարվածությանը, Թուրքիայում գտնվում են ավելի քան 40 հազար աշխատանքային ներգաղթյալներ (Թուրքիայի կառավարության տվյալներով այդ թիվը հասնում է 70 հազարի):
– Հրանտ Դինքի սպանությունից հետո զանգվածային դատապարտման շարժումը հարգանքի նշան է այլ մշակույթների նկատմամբ:
– Երիտասարդությունը լավ չի հասկանում, թե ինչ է տեղի ունեցել Առաջին համաշխարհային պատերազմի տարիներին և Ցեղասպանության հարցի քաղաքականացումը կարող է միայն ատելություն առաջացնել:
Բրայզան շեշտել է, որ Հայոց ցեղասպանության բանաձևի ընդունման դեպքում միայն ծայրահեղ ազգայնական տրամադրությունների աճի և Թուրքիայում հայկական համայնքին սպառնացող վտանգի փաստարկներին ապավինելը կառուցողական չէ Թուրքիայի կողմից: