ԱԺ ՕԵԿ-ական պատգամավոր Հովհաննես Մարգարյանը երեկ մեզ հետ զրույցում չբացառեց, որ առաջիկա խորհրդարանական ընտրություններին ՕԵԿ-ը մասնակցի միայնակ: Բայց նաև չբացառեց ՀՀԿ-ի հետ ՕԵԿ-ի դաշինքը՝ պատճառաբանելով, թե քաղաքական դաշտում ամեն ինչ հնարավոր է:
– Երեկ ԲՀԿ առաջնորդ Գագիկ Ծառուկյանը հայտարարեց, որ առաջիկա խորհրդարանական ընտրություններին ԲՀԿ-ն առանձին է մասնակցելու, քանի որ հզորությամբ երկրորդ ուժն է: Ինչպե՞ս եք վերաբերում Գագիկ Ծառուկյանի այդ հայտարարությանը:
– Ճիշտն ասած, չեմ ցանկանա մեկնաբանել որևէ քաղաքական ուժի հայտարարություն: Պարզապես կասեմ, որ ցանկացած քաղաքական ուժ ինքն է քաղաքական դաշտում որոշումներ կայացնում:
– Ամեն դեպքում, կոալիցիոն ուժերը ամիսներ առաջ հուշագիր էին ստորագրել, որով պաշտպանում էին Սերժ Սարգսյանին, այնինչ Գագիկ Ծառուկյանը նման հայտարարությամբ հանդես եկավ: Իսկ սա մի հայտարարություն է, որը կարող է քաղաքական դաշտում իրավիճակ փոխել: Ի՞նչ կանխատեսումներ ունենք այս ուղղությամբ:
– Մեր ստորագրած հուշագիրը երկու ուղղություն ուներ: Մեկը միտված էր կոալիցիայի ավելի կանխատեսելի լինելուն ու համախմբվածությանը: Իսկ երկրորդ մասը վերաբերում էր գալիք նախագահական ընտրություններին, որտեղ ամրագրված էր, որ կոալիցիան 2013 թ. նախագահական ընտրություններին կմասնակցի իր թեկնածուով՝ ի դեմս նախագահ Սերժ Սարգսյանի: Ինչ վերաբերում է խորհրդարանական ընտրություններին, կարծում եմ, դեռ վաղ է կանխատեսումներ անել, քանի որ Ընտրական օրենսգիրքը նոր է ընդունվում, և աշնանը նոր բուռն զարգացումներ կսկսվեն: Ես կոնկրետ մեր մասով կխոսեմ, քանի որ այս 17 տարիների ընթացքում մենք բոլոր համապետական ընտրություններին, այդ թվում՝ նաև տեղական ինքնակառավարման ընտրություններին, մասնակցել ենք, և միշտ էլ մեր ծանրակշիռ ներկայությունն ենք ունեցել հայրենի քաղաքական դաշտում: Ավելին` առանց որևէ քոռ կոպեկի մենք ստացել ենք ձայներ թե ընդդիմության ճամբարում, թե իշխանության:
– Նման հաղթաթղթի առկայության դեպքում ինչո՞ւ ՕԵԿ-ը առանձին չի մասնակցում խորհրդարանական ընտրություններին, այլ ավելի վաղ հայտարարեց, թե ՀՀԿ-ի հետ է մասնկցելու ընտրություններին:
– Եթե հիշում եք, 2008 թ. Արթուր Բաղդասարյանը Սերժ Սարգսյանի հետ փոխգործակցության հուշագիրը ստորագրեց, և քանի որ մենք հրապարակավ բաց քաղաքական ուժ ենք, այդ ժամանակ հայտարարեցինք, որ գալիք 2013 թ. նախագահական ընտրություններին պաշտպանելու ենք Սերժ Սարգսյանի թեկնածությունը: Ավելին, դա ամիսներ առաջ արձանագրվեց նոր հուշագրով: Իսկ այն, թե արդյոք կարո՞ղ ենք ՀՀԿ-ի հետ դաշինքով մասնակցել՝ մենք ուղղակի չենք բացառում, որովհետև քաղաքական դաշտում ամեն ինչ հնարավոր է: Չի բացառվում նաև, որ միայնակ մասնակցենք: Վերջիվերջո, լինում են և նախընտրական, և հետընտրական դաշինքներ:
– Լավ, ինչպե՞ս է վերաբերվում ՕԵԿ-ը իշխանության և ընդդիմության միջև սկսված հեռակա երկխոսությանը:
– Ես միշտ դրական եմ վերաբերվել երկխոսությանը, որովհետև պրոբլեմների դեմ ոչ թե պետք է պայքարես, այլ պրոբլեմները պետք է քննարկման առարկա դարձնես կլոր սեղանի շուրջը, լսես կարծիքները և հնարավորինս իրական լուծումները գտնես: Եթե հիշում եք, 2004 թ., երբ Արթուր Բաղդասարյանը ԱԺ նախագահն էր, ընդդիմության մեր գործընկերները շուրջ մեկ տարի բոյկոտեցին խորհրդարանի նիստերը, որից հետո սկսվեց երկխոսություն: Արթուր Բաղդասարյանի կողմից կազմակերպվեցին քաղաքական կոնսուլտացիաներ և ընդդիմությունը վերադարձավ խորհրդարան: Ուզում եմ ասել, որ երկխոսությունը բերում է հաջողության և խնդրի կարգավորման:
– Ամեն դեպքում երկխոսությունը իրեն երկար սպասեցնել չտվեց, ուշացած չէր:
– Գիտեք, երկխոսության առաջին պայմանը եղավ դեռ 2008 թ. նախագահական ընտրություններից հետո, երբ Սերժ Սարգսյանը դիմեց բոլորին և առաջարկեց միավորվել: Դրանից հետո էլ երկխոսելու նախադրյալներ կային, պարզապես չէր ստացվում: Բայց ասում են՝ ավելի լավ է ուշ, քան երբեք: Դա հօգուտ մեր ազգի, մեր ժողովրդի և մեր ապագայի է:
– Համաներման հետ կապված հիմնականում շոշափվում են Նիկոլ Փաշինյանի և Սասուն Միքայելյանի անունները: Սակայն ընդդիմությունը ներկա պահին 6 ընդդիմադիր գործիչ ունի ազատազրկման վայրերում: Ի՞նչ է, համաներումը միայն Սասուն Միքայելյանի և Նիկոլ Փաշինյանի վրա՞ է տարածվելու:
– Իմ տեղեկություններով, շուրջ 500 հոգու վրա է ազդելու համաներումը: Հիմա 500 հոգին բավական մեծ թիվ է: Ես ողջունում եմ նախագահի այս քայլը մեր անկախության 20-ամյա տարելից նախաշեմին: Ընդհանուր առմամբ, սա մարդասիրական քայլ է, և հուսով եմ, մյուսների վրա էլ կատարածվի այս համաներումը:
– Առաջիկա ընտրություններում ո՞ւմ եք տեսնում որպես ձեր գլխավոր մրցակից:
– Գիտեք ինչ, բոլորն էլ մրցակից են, մենք ցանկանում ենք, որ լինի արժանապատիվ մրցակցություն և հավասար պայմաններ ստեղծվեն բոլոր թիմերի համար: Մենք ունենք մեր կայուն ընտրազանգվածը, որը միշտ ունեցել ենք, և այն գնալով ավելացել է: Նախագահական ընտրություններում Արթուր Բաղդասարյանը, առաջին անգամ մասնակցելով, կարողացավ շուրջ 20 տոկոս ձայն հավաքել: Ավելին` մենք եղել ենք այն քաղաքական ուժը, որը, լինելով ընդդիմության դաշտում, դուք ինքներդ գիտեք, թե ինչ հարվածներ ստացավ և այլն, և այլն: Սակայն գալիք ընտրությունների վերաբերյալ մեր տեղի կառույցներից ինֆորմացիա ենք ստանում, որ ավելի լավ է լինելու, ավելի ծանրակշիռ ներկայացվածություն ենք ունենալու: Բայց, ի տարբերություն շատերի, մենք որևէ քոռ կոպեկ չենք բաժանել ժողովրդին և չենք էլ պատրաստվում բաժանել: