Ինչպես հաղորդում է բելառուսական Хартия-97 ընդդիմադիր կայքը, Բելառուսի նախագահ Ալեքսանդր Լուկաշենկոն հավանաբար ազատ կարձակի դեկտեմբերի 19-ից հետո ձերբակալված բոլոր ընդդիմադիրներին: Այս մասին հայտարարել է ինքը՝ Լուկաշենկոն՝ ելույթ ունենալով Ղազախստանի մայրաքաղաքքում:
«Ոնց որ թե բոլորին ազատել ենք, բացի երկուսից, որոնք առաջին գծում էին կանգնած: Կազատենք, հավանաբար, նաև նրանց»,- ասել է Բելառուսի նախագահը: Լուկաշենկոն այս քայլը բացատրել է նրանով, որ այս բանտարկյալները ավելորդ ծախսում են պետության փողերը, և անհրաժեշտություն չկա նրանց վրա գումար ծախսելու: Սակայն իրականում փորձագետները այս քայլերի պատճառները տեսնում են երկրի տնտեսության ծայրահեղ վատ վիճակի մեջ:
Մենք արդեն տեղեկացրել ենք, որ Բելառուսում բելառուսական ռուբլին արժեզրկվել է ավելի քան 50%-ով, երկրի խանութները սնունդ և վառելիք չեն վաճառում կամ վաճառում են աստղաբաշխական գներով: Բելառուսի նախագահին հիմա անհրաժեշտ է տնտեսության մեջ շեշտակի բարեփոխումներ իրականացնել, սակայն նա այդ քայլին չի կարող գնալ առանց օտարերկրյա ներդրումների: Իսկ քաղբանտարկյալների առկայությունը, ինչպես նաև Լուկաշենկոյի դիկտատորական գործողությունները, մեղմ ասած, չեն կարող նպաստել դրան:
