Երևանի կենտրոնական փողոցներում վճարովի ավտոկայանատեղերի մասին օրենքը մեծ խնդիրների է հանգեցնելու: «Առաջին լրատվական»-ի հետ զրույցում Երևանում գործող տաքսի ծառայություններից մեկի ղեկավարը, որը չցանկացավ ներկայանալ, նշեց, որ խնդիրները դեռ նոր են ամբողջությամբ ի հայտ գալու:
«Այս որոշմանը համաձայն չեմ միանշանակ, որովհետև մի շարք խնդիրների ենք բախվելու: Նախ՝ պետք է պարզել՝ ինչ կարգով է վճարվելու այդ գումարը: Խնդիրներ են առաջանալու վարորդների և պատվիրատուների միջև: Մի պահ Ձեզ պատկերացրեք պատվիրատուի դերում. ձեր խնդրանքով, ձեր հարմարությունից ելնելով՝ վարորդը պետք է կանգնի ձեր խնդրած տեղում և սպասի ձեզ, իսկ այդ գումարն ինքն է տալու: Պատվիրատուն, բնականաբար, չի վճարելու, իսկ տաքսու վարորդի համար դա սարսափելի մեծ թիվ է»,- ասաց նա:
Մեր զրուցակցի խոսքով՝ ոչ մի տրանսպորտային միջոց այնքան չի կայանում, որքան տաքսին, և այս հարցը միշտ խնդրահարույց է լինելու` կապված տաքսի ծառայության, նրան պատկանող մեքենաների հետ: Վճարովի ավտոկայանատեղիների գումարը վարորդը չի վճարելու, և պետությունը պահանջելու է ՍՊԸ-ից, քանի որ մեքենան վերջինիս է պատկանում:
Հարցին, թե որն է նշված խնդրի լուծումը, տաքսի ծառայության ղեկավարը պատասխանեց՝ կարմիրը դարձնում ենք դեղին, ու վերջ, խնդիրը լուծված է:
Այսուհանդերձ, տաքսի ծառայությունը չի պատրաստվում գները բարձրացնել անգամ հետագայում, իհարկե, եթե վառելանյութը չթանկանա: «Անախորժություններն ու բախումներն անխուսափելի են. մեքենա կա՝ երկու հոգի են վարում. այս դեպքում կոնֆլիկտ է սպասվում նաև վարորդների միջև՝ պարզելու համար, թե ով պետք է վճարի այդ գումարը»,- նշեց նա:
Մեր կողմից հարցված մյուս տաքսի ծառայություններում խուսափում էին խնդիրների մասին բարձրաձայնելուց: Պատճառը, ըստ երևույթին, վախն էր:
Երևանի ավագանու որոշմամբ` քաղաքի կենտրոնական փողոցներում հուլիսի 1-ից ուժի մեջ պետք է մտներ վճարովի ավտոկայանատեղերի մասին օրենքը, սակայն տուգանքները կիրառվելու էին օգոստոսի 1-ից: Կայանման վարձավճարները կազմում են յուրաքանչյուր մեկ ժամի համար` 100 դրամ, յուրաքանչյուր մեկ օրվա համար` 500 դրամ, մեկ շաբաթվա համար`1 հազ. դրամ, մեկ ամսվա համար` 2 հազ. դրամ, մեկ տարվա համար`12 հազ. դրամ: Վճարովի ավտոկայանատեղիների կազմակերպումն իրականացնում է «Փարկինգ սիթի սերվիս» ընկերությունը:
Հիշեցնենք` հաշվի առնելով, որ հուլիս-օգոստոս ամիսները ամառային հանգստի ակտիվ շրջան են, և, ըստ էության, հազարավոր երևանցիներ այս ընթացքում բացակայում են մայրաքաղաքից, քաղաքապետ Տարոն Մարգարյանի առաջարկությամբ որոշվել է ավտոկայանատեղի տուրք չվճարած անձանց նկատմամբ վարչական տույժերի կիրառումը հետաձգել մինչև սեպտեմբերի 1-ը՝ հնարավորություն տալով վարորդներին այդ ընթացքում վճարել տեղական տուրքը:
Հարկ է նշել, որ մինչ օրս ավտոկայանատեղի տուրք չվճարելու համար որևէ վարորդ վարչական տույժի չի ենթարկվել, և որոշ ԶԼՄ-ների կողմից տարածած նման լուրերը չեն համապատասխանում իրականությանը:
Որոշվել է նաև նշված ժամանակահատվածում շարունակել ակտիվ և բազմակողմ իրազեկումը, որպեսզի տուրք վճարողները լիովին տեղեկացված լինեն իրենց իրավունքների և պարտականությունների մասին, ինչպես նաև վճարումների մեխանիզմներին: Հաշվի առնելով, որ, գործող օրենսդրության համաձայն, տուրքը սահմանվում և վճարվում է ընթացիկ տարվա համար, և 2013թ. համար վճարված ցանկացած տուրք գործում է մինչև 2013թ. դեկտեմբերի 31-ը, խորհրդակցության շրջանակում քաղաքապետն անդրադարձել է նաև նշված խնդրին և հանձնարարել է իրազեկել բնակչությանը մինչև տարեվերջ օգտվել ավտոկայանատեղի տուրքի առավելագույնը ամսական դրույքաչափից, իսկ արդեն տարեկան վճարում կատարած անձանց վերահաշվարկ կատարելու նպատակով՝ քաղաքապետարան դիմելու իրավունքի մասին»:
