Սկսած իննսունական թվականների վերջից՝ քաղաքում նոր թափ առավ պատմական և մշակութային հուշարձանների վերացման, հանրային տարածքների, կանաչ գոտիների, բակերի և մայթերի զավթման հանցագործ գործընթացը: Օրենքների կոպիտ խախտումներով և մասնագիտական առումով ոչ գրագետ ճարտարապետական ծրագրերը այդ ժամանակվա քաղաքի գլխավոր ճարտարապետի ղեկավարությամբ և իշխանությունների հովանավորությամբ մայրաքաղաքի քաղաքաշինական զարգացումը տարան ծայրահեղ սխալ ուղով` խաթարելով քաղաքի բնականոն կյանքը և աղավաղելով մայրաքաղաքի դիմագիծը: Այդ ծրագրերի հիմքում դրված էր անբարո գաղափար` մայրաքաղաքը իր պատմությամբ, մշակույթով, հանրային նշանակության տարածքներով և մարդկանցով ծառայեցնել մի խումբ մարդկանց մասնավոր շահերին:
Այժմ նախկին գլխավոր Ճարտարապետի վերանշանակումով հաստատվում է, որ ներկա իշխանությունների “Առաջ Հայաստան” կարգախոսը ընդամենը նշանակում էր հասարակության կողմից մերժված, քրեականացված նոմենկլատուրայի մշտական վերադարձ, արատավոր անցյալի վերարտադրում, այսինքն` «Հետ Հայաստան»: Դա նաև նշանակում է, որ երկրի նախագահը իր կադրային քաղաքականությամբ արհամարհում է հասարակական կարծիքը և այդպիսով էլ ավելի խորացնում անջրպետը իր և հասարակության միջև:
«Ժառանգություն» կուսակցությունը հայտարարում է, որ երկրի ապագայի համար մտահոգ բոլոր առողջ ուժերի ե քաղաքացիների հետ միասին այսուհետ առավել մեծ վճռականությամբ և անհանդուրժողականությամբ պայքարելու է երկրի ապագայի համար խիստ վտանգավոր և կործանարար վերոնշյալ գործընթացների դեմ:
