Ինչպես արդեն ներկայացրել ենք, ՀՀ Ազգային վիճակագրական ծառայությունը օրերս հրապարակել է 2016թ. տնտեսական ակտիվության ցուցանիշը օպերատիվ տվյալներով: Համաձայն դրա՝ անցած տարում ՀՀ-ի ՏԱՑ-ի (կամ ՀՆԱ-ի) աճը կազմել է 100.5%: Չքննարկելով այդ ցուցանիշի ինչպիսին լինելը մեր տնտեսության համար՝ պարզապես արձանագրենք, թե տնտեսության որ ոլորտները զարգացման ինչ մակարդակ են ապահովել անցած տնտեսական տարում:
Արդյունաբերությունում գրանցվել է 6.7% տնտեսական աճ՝ 1.429 մլրդ-ի արտադրանքի ծավալով: Ընդ որում, 2015թ.-ի համեմատությամբ անցած ամբողջ տարվա ընթացքում գրանցվել է արտադրական ծավալների աճ: Ամենաթույլ աճի դեպքում անգամ 2.5-3%-անոց վերելքի տեմպը պահպանվել է:
Գյուղատնտեսության ոլորտում, որ վերջին մի քանի տարիներին անընդմեջ լուրջ տնտեսական աճ էր ապահովում, արձանագրվել է 5.2%-անոց անկում, ինչն աննախադեպ է այս ոլորտի համար վերջին տարիների առումով: Այստեղ տարեսկզբից մինչև մայիս ամիսը ներառյալ կայուն աճ է արձանագրվել: Հունիս-հուլիսին, պայմանավորված թերևս 2015թ.-ի համեմատությամբ ծիրանի ցածր բերքով, որոշակի անկում է ցույց տրվել, օգոստոսին 10%-անոց աճով փոխհատուցվել է նախորդ ամիսների անկումը, բայց սեպտեմբեր-հոկտեմբերին արդեն Կարեն Կարապետյանի՝ վարչապետի պաշտոնը ստանձնելուց ի վեր ցուցանիշների 20-30%-անոց անկում է արձանագրվել: Դրա ԱՎԾ-ական բացատրությունը թերևս կվերաբերի խաղողի արտադրության ծավալների անկմանը: Իսկ նոյեմբեր ամսին արձանագրված աճը Ստեփան Մնացականյանը բացատրում էր հոկտեմբերին անձրևների պատճառով չհավաքված կաղամբի քաղով:
Այդուհանդերձ, ամենաակտիվ երկու ամիսների մոտ 50%-անոց անկման շնորհիվ արդյունքում ունեցել ենք վերջին տարիների համար նախադեպը չունեցող անկում մի ճյուղում, որը թերևս 2009թ.-ի ճգնաժամից հետո փոխարինելով շինարարությանը՝ «էապես նպաստում էր» մեր տնտեսության 2-3%-անոց կայուն աճին: Ոլորտի համախառն արտադրանքի ծավալը կազմել է 907.5 մլրդ դրամ:
Շինարարության ոլորտում անկումը կազմել է 11%: Ընդ որում, բացի հունվար-փետրվար ամիսներից (հունվարին շինարարության ծավալը եղել է 8.2 մլն դրամի), մնացած բոլոր ամիսներին ոլորտում անկումը եղել է կայուն, առավելապես երկնիշ: Ընդ որում, տարվա առաջին ամիսներին հասկանալիորեն ծավալները տասնապատիկ փոքր են եղել սեզոնին կատարվող շինարարության ծավալներից: Տարվա ընթացքում հանրապետությունում իրականացվել է 398 մլրդ դրամին համապատասխան շինարարություն:
Առևտրաշրջանառության ընդհանուր ծավալը նախորդ տարվա համեմատությամբ աճել է 1.0%-ով: Ընդհանուր առևտրաշրջանառության բացարձակ թիվը կազմել է ավելի քան 2 տրիլիոն 233 մլրդ դրամ: Ընդ որում, մինչև նոյեմբեր որոշակի տատանումներով 1-2%-անոց աճ կամ անկում է եղել, և միայն տարեվերջյան երկու ամիսներին ավելի քան 4%-անոց աճի շնորհիվ բալանսում դրական արդյունք է ստացվել:
Ծառայությունների ոլորտում (առանց առևտրի) արտաքին առևտրաշրջանառությունից հետո ամենաբարձր աճն է գրանցվել՝ 7.1%: Տարվա բոլոր ամիսներին այս ոլորտում զգալի աճ է գրանցվել, մեծամասամբ երկնիշ՝ բացառությամբ դեկտեմբերի, երբ ունեցել ենք 0.6%-անոց անկում:
Տնտեսության կարևորագույն ցուցիչներից մեկի՝ էլեկտրաէներգիայի արտադրության առումով 6.2%-անոց անկում է արձանագրվել: Տարվա ընթացքում արտադրվել է 7 մլրդ 215 մլն կվտ/ժամ էլեկտրաէներգիա:
Սոցիալ-տնտեսական իրավիճակի կարևորագույն ցուցիչ է նաև միջին ամսական անվանական աշխատավարձը, որտեղ գրանցվել է 1.7%-անոց աճ: Ընդ որում, պետական հատվածում գրանցվել է մոտ 2%-անոց անկում, ոչ պետականում՝ 4.5%-անոց աճ: Տարվա միջին ցուցանիշը կազմել է 187850 դրամ: Պետական հատվածի աշխատողներինը՝ 161872 դրամ, մասնավորինը՝ 221850 դրամ:
2016թ.-ի ընթացքում արտաքին առևտրի ոլորտում կատարվել է 5 մլրդ 75 մլն դոլարի առևտուր, որից 3.3 մլրդը՝ ներմուծում:
Արտաքին առևտրաշրջանառության ծավալները աճել են 7.4%-ով, ընդ որում. արտահանումը՝ դոլարային արտահայտությամբ, 20%-ով, իսկ ներմուծումը՝ 1.6%-ով:
Արձանագրվել է սպառողական գների ինդեքսի 1.4%-անոց անկում և արդյունաբերական արտադրանքի գների ինդեքսի 1.5%-անոց աճ:
Դրամի փոխարժեքը ԱՄՆ դոլարի նկատմամբ կազմել է միջինում 480.49 դրամ: Դրամի ամենացածր արժեքը գրանցվել է փետրվար ամսին՝ 493.64 դրամ 1 դոլարի դիմաց, ամենաբարձրը սեպտեմբերին՝ 474.10 դրամ 1 դոլարի դիմաց: Մինչև ապրիլ ամիսը 1 դոլարի արժեքը բարձր է եղել 480 դրամից, մայիս-նոյեմբեր ժամանակահատվածում տատանվել է 470-480-ի միջակայքում, դեկտեմբերին դարձյալ բարձր է եղել 480 դրամից:
Համաձայն ներկայացվածի՝ պարզ է դառնում, որ տնտեսության զրոյական վիճակը պահպանվել է առաջին հերթին շնորհիվ սպասարկումների ոլորտում արձանագրվող աճի:
Տնտեսության ճյուղերին առավել մանրամասն կանդրադառնանք սոցիալ-տնտեսական վիճակը բնութագրող ցուցանիշների հրապարակումից հետո: