ԱՄՆ-ում մահացել է երաժշտական PR-ով զբաղվող Սիդ Բերնստայնը, որը հայտնի է The Beatles-ի և այլ նշանավոր խմբերի ու երաժիշտների հետ աշխատանքով: Այս մասին հայտնում է BBC-ն:
Բերնստայնը մահացել է օգոստոսի 21-ին Նյու Յորքի կլինիկաներից մեկում: Նա 95 տարեկան էր, ուներ կին, 6 երեխա և 6 թոռ:
Բերնստայնը եղել է ԱՄՆ-ում The Beatles-ի հետ համագործակցած առաջին մենեջերներից մեկը: ԱՄՆ-ում լիվերպուլյան քառյակի առաջի հյուրախաղերի ժամանակ՝ 1964 թվականին, նա էր կազմակերպել խմբի ելույթը Քարնեգի հոլում: Նա նաև 1965 թվականին խմբի՝ Shea մարզադաշտում համերգի կազմակերպիչն էր, որին ներկա էր ավելի քան 50 հազար հանդիսական:
Նա աշխատել է նաև The Rolling Stones-ի, Ջուդի Գարլանդի, Ռեյ Չարլզի և Ջիմի Հենդրիքսի հետ:
93 տարեկանում Բերնստայնը թողարկել է իր առաջին սոլո ալբոմը՝ Sid Bernstein Presents, որում կատարել է իր հետ համագործակցած կատարողների՝ իր սիրելի երգերը:
