Վրացական Georgia Times կայքի փոխանցմամբ, վրացական ընդդիմության առաջնորդներից, խորհրդարանի նախկին խոսնակ Նինո Բուրջանաձեն հայտարարել է, որ ընդդիմության բողոքի ակցիաների հետագա զարգացումը կախված է լինելու մարդկանց թվաքանակից.
«Այսօր ամեն ինչ կախված է մարդկանց թվաքանակից: Եթե Թբիլիսիում՝ Հանրային հեռուստատեսության շենքից մինչև «Ազատության» հրապարակ, մեր երթին չմասնակցեն բավարար քանակությամբ մարդիկ, ապա դա կլինի վրաց ժողովրդի պարտությունը:
Մենք միշտ էլ ասել ենք, որ ուժը դա ժողովրդի մեջ է, և առանց դրա հաղթելն անհնար է: Իշխանությունները ձեռնարկել են ամեն ինչ՝ ընդդիմության խաղաղ ակցիաների անցկացումը խափանելու համար: Մենք ամեն ինչ անում ենք մեր պայքարն իր ավարտին հասցնելու համար»:
Բուրջանաձեն նաև զարմանք է արտահայտել, որ երկրի մյուս ընդդիմադիր ուժերը չեն միացել իրենց:
Հիշեցնենք, որ Բուրջանաձեն չէր բացառել իշխանությունների կողմից իր ձերբակալման հնարավորությունը: