Եգիպտոսի դատարանն այսօր քննել է երկրի նախկին նախագահ Հոսնի Մուբարաքին կալանքից ազատ արձակելու գործը:
Ինչպես հաղորդում է Reuters գործակալությունը՝ վկայակոչելով դատական և իրավապահ մարմինների իր աղբյուրներին, դատարանը վճռել է ազատ արձակել նախկին նախագահին: Այժմ Մուբարաքը կարող է հեռանալ բանտից մինչև օրվա վերջ:
Նախկին նախագահը ազատության մեջ կսպասի իր դեմ նոր գործընթացին, քանի որ նրան կալանքի մեջ պահելու օրինական հիմքեր չկան:
Խոսքն այսպես կոչված «պալատական գործի» մասին է, որի շրջանակներում մեղադրող կողմը փորձել է ապացուցել, որ Մուբարաքը և նրա որդիները յուրացրել են ավելի քան 150 միլիոն դոլար, որը հատկացվել է երկրի բյուջեից պետության ղեկավարի նստավայրի վերանորոգման ու սպասարկման համար:
Մուբարաքը բանտում է գտնվում ավելի քան երկու տարի: Դատարանը նրան դատապարտել էր ցմահ բանտարկության ցուցարարների մահվան մեջ մասնակից լինելու մեղադրանքով, սակայն դատավաճիռը չեղյալ էր հայտարարվել գերագույն ատյանի դատարանի կողմից:
