Կենտրոն և Նորք-Մարաշ վարչական շրջանների ընդհանուր իրավասության դատարանում Մխիթար Պապոյանի նախագահությամբ ավարտվել է գեղարվեստի պետական ակադեմիայի դասախոսների՝ Սվետլանա Գևորգյանի և մյուսների գործի դատավարությունը:
Սվետլանա Գևորգյանը, աշխատելով գեղարվեստի պետական ակադեմիայում որպես ուսումնագիտական գծով պրոռեկտոր, ռեկտորի հրամանով ի պաշտոնե ընդգրկվել է 2012-2013 թթ. ուստարվա ընդունելության քննությունների ընդունող հանձնաժողովի կազմում՝ որպես հանձնաժողովի նախագահի տեղակալ:
Ըստ մեղադրանքի՝ Գևորգյանը և նույն հանձնաժողովի պատասխանատու քարտուղար, համակարգչային գրաֆիկայի, դեկորատիվ կիրառական արվեստի ամբիոնի վարիչ Հայկ Փայասլյանը նախնական համաձայնության գալով՝ իրենց պաշտոնեական դիրքն օգտագործել են ակադեմիայի դիմորդ Բարբարյանի օգտին գործողություններ կատարելուն նպաստելու՝ քննությունների արդյունքներն ակադեմիա ընդունվելու համար անցողիկ միավորներով ապահովելու միջոցով ակադեմիա ընդունելու համար: 2012 թվականի ապրիլին ակադեմիայի կերպարվեստի ֆակուլտետի դեկան Խաչիկ Ազիզյանի միջնորդությամբ նրանք 3500 դոլար կաշառք ստանալու առաջարկը ընդունել են Բարբարյանի մորից՝ Արմինե Ենոքյանից և վերջինիս ամուսնուց՝ Արայիկ Ֆահրադյանից, իսկ 2012 թվականի մայիսին Ազիզյանի միջոցով կաշառատու ծնողներից ստացել են 3500 դոլար կաշառքը:
Այնուհետև, ընդունելության քննությունների ավարտից հետո Խաչիկ Ազիզյանից տեղեկանալով, որ Բարբարյանն ընդունվել է վճարովի համակարգ, ու նրա ծնողները տված կաշառքից 2500 դոլարը հետ են պահանջել, ավելորդ խոսակցություններից զերծ մնալու համար կրկին Ազիզյանի միջոցով 2012 թվականի հուլիսի 20-ին 2500 դոլարը վերադարձրել են Արայիկ Ֆահրադյանին:
Այս գործով կաշառք վերցրած դասախոսների կողքին ամբաստանյալի աթոռին նստած էին նաև կաշառատվության համար մեղադրվող Արայիկ Ֆահրադյանն ու Արմինե Ենոքյանը:
Սվետլանա Գևորգյանը և Հայկ Փայասլյանն իրենց մեղավոր չեն ճանաչել, իսկ Խաչիկ Ազիզյանը մեղավոր է ճանաչել և հայտնել, որ դիմորդի ծնողները հանդիպել են իրեն, ասել, թե իրենց տղայի ընդունելության համար կարող են վճարել 3500 դոլար: Ինքն ասել է, թե մեկ օր հետո կզանգահարի նրանց: Գնացել է Սվետլանա Գևորգյանի մոտ, հայտնել դիմորդի ծնողների առաջարկի մասին: Գևորգյանը համաձայնել է:
Մայիս կամ հունիս ամիսներին ինքը այդ ծնողներին տեղեկացրել է, որ գումարը բերեն: Արմինեն եկել է իր աշխատասենյակ, պայուսակից հանել գումարը և տվել իրեն: Նրա գնալուց հետո ինքը գնացել է Սվետլանա Գևորգյանի աշխատասենյակ, վերցրած գումարը տվել նրան: Գևորգյանն ասել է, որ հազար դոլարը վերցնի իրեն՝ միջնորդության համար: Ինքը ասել է դիմորդի ազգանունը, այն բաժնի անվանումը, ուր նա պետք է ընդունվեր:
Երբ դիմորդն ընդունվել է վճարովի բաժին, նրա ծնողները դժգոհել են: Բայց ինքը խոստացել էր միայն ընդունելության հարցը լուծել, վճարովիի կամ անվճարի մասին խոսք չի գնացել: Արայիկ Ֆահրադյանը պնդել է, որ 2500 դոլարը վերադարձնեն: Ինքը հարցրել է՝ ինչո՞ւ մնացած հազար դոլարն էլ չեն պահանջում: Արայիկն ասել է՝ որովհետև տղան ընդունվել է:
Ինքը դիմորդի ծնողների պահանջի մասին հայտնել է Սվետլանային, վերջինս կանչել է Հայկ Փայասլյանին: Որոշել են գումարը վերադարձնել, որ անախորժություններ չլինեն: Սվետլանան Հայկին ասել է՝ Հայկ, 1500-ը դու տուր, Խաչիկ, դու էլ քո մոտի 1000 դոլարը դիր, ու 2500 դոլարը տվեք ծնողներին:
Այդպես էլ արել են: Բայց Արայիկը զանգել ու ասել է, թե մնացած հազար դոլարն էլ պիտի վերադարձնեն: Ինքն ասել է՝ վաղը կպատասխանեմ: Բայց հաջորդ օրն իրեն հրավիրել են ոստիկանություն:
Դատարանում իրենց մեղավոր չեն ճանաչել կաշառք տալու համար մեղադրվող ամուսինները: Սակայն դատական վիճաբանությունների փուլում Արայիկ Ֆահրադյանն իրեն մեղավոր է ճանաչել ու զղջացել կատարածի համար: Նրանց ընտանիքում վեճեր են եղել, ամուսինը չի ցանկացել, որ տղայի ընդունելության համար գումար տան: Կաշառքի տալը պնդել է տղայի մայրը, ասել, թե ինքը գումար ունի հավաքած տղային հենց ուսման հարցում աջակցելու նպատակով:
Արմինե Ենոքյանն ասել է, թե իր կարծիքով՝ կաշառք վերցնողների կողմից իր տղային որևէ օգնություն չի եղել, նա ընդունվել է իր ուժերով, մինչև ընդունելությունը տղան պարապել է ակադեմիայի դասախոսների մոտ: Քննությունների արդյունքում նա հավաքել է 39 միավոր: Անվճար անցնելու համար հարկավոր էր 41 միավոր: Կաշառք տալու վերաբերյալ ոստիկանությունում հաղորդում տվել էին իրենց խաբված համարող ամուսինները:
Ընդհանուր իրավասության դատարանը, հաշվի առնելով Սվետլանա Գևորգյանի կատարած հանցավոր արարքի հանրության համար վտանգավորության աստիճանը, նրան մեղավոր է ճանաչել և դատապարտել 7 տարի ազատազրկման:
Հայկ Փայասլյանը դատապարտվել է 1 տարի ազատազրկման: Դատավճռի հրապարակման պահին այդ մեկ տարին լրացել էր, և Փայասլյանն անհապաղ ազատ է արձակվել դատական նիստերի դահլիճում:
Խաչիկ Ազիզյանը դատապարտվել է 200 հազար դրամ տուգանքի:
Կաշառատուներ Արայիկ Ֆահրադյանը և Արմինե Ենոքյանը դատապարտվել են 3-ական տարի ազատազրկման: Նրանց նկատմամբ պայմանական դատապարտություն է կիրառվել, և յուրաքանչյուրի համար սահմանվել է 2-ական տարի փորձաշրջան:
Սվետլանա Գևորգյանը ՀՀ վաստակավոր մանկավարժի պատվավոր կոչում ունի, Հայկ Փայասլյանն ու Խաչիկ Ազիզյանը պարգևատրվել են հուշամեդալներով, երեքն էլ գիտական աստիճաններ ունեն: Եվ, ի հակադրություն այդ պարգևների ու վաստակների, յուրաքանչյուրը, ըստ իր կատարած հանցավոր արարքի, դատավճռով սահմանված իր պատիժն ունի ու «կաշառք» բառի նկատմամբ իր նորացված, ցավոտ վերաբերմունքը:
Այս գործով բոլորը, կարծես, իրենց զոհ էին համարում: Մինչդեռ…
P.S. Ի դեպ․ այս ԲՈՒՀ-ի ռեկտորը ԲՀԿ կուսակցության վարչության անդամ Արամ Իսաբեկյանն է:
