Ֆրանսիական «Ազգային ճակատ» կուսակցության առաջնորդ, Ֆրանսիայի նախագահի թեկնածու Մարին Լե Պենը գերմանական Կոբլենց քաղաքում Freedom for Europe համաժողովում ելույթի ժամանակ ԱՄՆ նախագահ Դոնալդ Թրամփին անվանել է «երկրորդ հարվածը հին Եվրոպային Brexit-ից հետո»: Այս մասին հայտնում է RIA Novosti-ն:
Լե Պենը նաև եվրոպացի ընտրողներին կոչ է արել «հետևել ամերիկացիների և անգլիացիների օրինակին և արթնանալ 2017 թ.»:
«2016 թ. անգլոսաքսոնական աշխարհն արթնացավ: Ես համոզված եմ, որ 2017 թ. մայրցամաքային Եվրոպայի բնակիչները կարթնանան»,- ասել է Լե Պենը:
Նա նաև ԵՄ կազմից Մեծ Բրիտանիայի դուրս գալու որոշումն անվանել է «դոմինոյի էֆեկտի» սկիզբ:
«Երկրորդ հարվածն իրեն երկար սպասել չտվեց՝ պարոն Թրամփի ԱՄՆ նախագահ ընտրվելը: Եվրոպայի հարցում նրա դիրքորոշումը հստակ է՝ նա կողմ չէ ժողովուրդների ճնշման համակարգին»,- ասել է Լե Պենը:
