ՀՀ Ազգային ժողովի արտաքին հարաբերությունների մշտական հանձնաժողովի նախագահ Արտակ Զաքարյանի գլխավորած պատվիրակությանն ընդունել է Իսրայելի Պետության Կնեսետի խոսնակ Յուլի Էդելշտեյնը:
Ինչպես տեղեկացրին ՀՀ ԱԺ հասարակայնության և տեղեկատվության միջոցների հետ կապերի վարչությունից, ողջունելով հայկական պատվիրակությանը` Յուլի Էդելշտեյնը կարևորել է միջխորհրդարանական կապերի զարգացումը, հայ և հրեա ժողովուրդների միջև դարավոր բարեկամությունը և հայտնել իր պատրաստակամությունը` այսուհետ ևս ջանքեր ներդնելու տարբեր ոլորտներում համագործակցության համար` մասնավորապես ընդգծելով մշակույթի, տուրիզմի, տնտեսության և հատկապես գյուղատնտեսության ոլորտները: Կնեսետի խոսնակը կարևորել է նաև հայ և հրեա համայնքների ունեցած դերակատարությունը պետությունների զարգացման գործում:
Յուլի Էդելշտեյնը վերահաստատել է իր դիրքորոշումը, որ վաղ թե ուշ Կնեսետը պետք է ճանաչի Հայոց ցեղասպանությունը և ափսոսանք է հայտնել, որ առ այսօր Հայոց ցեղասպանությունը պաշտոնապես չի ճանաչվել Կնեսետի կողմից, սակայն վերջին շրջանում այդ ուղղությամբ իրականացվել են մի շարք քայլեր:
«Ես այդքան էլ հպարտ չեմ այն փաստով, որ Իսրայելը դեռևս չի ճանաչել Հայոց ցեղասպանութունը, բայց, այնուամենայնիվ, այդ ուղղությամբ արդեն առկա է որոշակի առաջխաղացում»,- ասել է խոսնակը:
Յուլի Էդելշտեյնը նաև հույս է հայտնել, որ ապագայում հնարավոր կլինի գտնել խաղաղ լուծուներ չկարգավորված հակամարտությունների համար: Կնեսետի խոսնակը խոստացել է աջակցել Իսրայելի և Հայաստանի միջև բարձրաստիճան պաշտոնյաների միջև հանդիպումների հաճախակի կազմակերպմանը, ինչպես նաև միջխորհրդարանական ակտիվ հարաբերությունների պահպանմանը:
Արտակ Զաքարյանը, շնորհակալություն հայտնելով հրավերի և ընդունելության համար, ևս ընդգծել է միջխորհրդարանական շփումների դերը միջպետական հարաբերությունների զարգացման, հասարակության միջև փոխադարձ հետաքրքրություն ունեցող ոլորտներում համատեղ ծրագրերի իրականացման, ինչպես նաև քաղաքական երկարատև փոխգործակցության առումով: Արտակ Զաքարյանը կարևորել է ՀՀ ԱԺ նախագահ Գալուստ Սահակյանի և Կնեսետի նախագահ Յուլի Էդլշտեյնի կողմից վերջերս ստորագրված միջխորհրդարանական փոխըմբռնման հուշագիրը, ինչպես նաև վերջերս Երևանում ձևավորված «հայ-իսրայելական միջազգային հասարակական ֆորումը»` որպես միջխորհրդարանական բարեկամական խմբերի գործունեության զարգացման ու ընդլայնման համար իրավական և հասարակական լայն բազա: Արտակ Զաքարյանը հույս է հայտնել, որ հունվարի 19-ին Թել Ավիվում կայանալիք երկրորդ ֆորումի արդյունքները կարող են շոշափելի լինել և քայլ առ քայլ նպաստել հասարակական փոխշահավետ հարաբերությունների ամրապնդմանը մի շարք ոլորտներում:
Արտակ Զաքարյանը ներկայացրել է նաև տարծաշրջանում տիրող իրավիճակը և դրանց հանգուցալուծման վերաբերյալ հայկական դիրքորոշումները:
Հանդիպման ավարտին պարոն Էդելշտեյնը հաջողություն է մաղթել Հայաստանի խորհրդարանին առաջիկա ընտրությունների կազմակերպման հարցում և հույս հայտնել, որ նորընտիր խորհրդարանում ևս ակտիվ կլինեն հայ-իսրայելական կապերը:
Նույն օրը Կնեսետի լիագումար նիստում Կնեսետի խոսնակը հատուկ ուղերձով ողջունել է հայկական խորհրդարանական պատվիրակությանը:
Ուղերձում մասնավորապես ասվում է.
«Կնեսետի անդամներ,
Ցանկանում եմ ողջունել Հայաստան-Իսրայել խորհրդարանական բարեկամության խմբին: Բարի գալուստ հարգարժան հյուրեր Երուսաղեմ, Իսրայելի մայրաքաղաք, և ժողովրդավարության մեր նստավայր Կնեսետ:
Հայ և հրեա ժողովուրդներն ունեցել են նմանատիպ ընդհանրություններ իրենց ողջ պատմության ընթացքում: 20-րդ դարում մեր ժողովուրդներն անցել են սարսափելի ողբերգությունների միջով՝ կանգնելով վերացման սպառնալիքի առջև: Մենք հայ ժողովրդին համարում ենք բարեկամեր, և հույս ունենք զարգացնել մեր կապերն ու համագործակցությունը նաև մշակույթի, տուրիզմի, տնտեսության, և հատկապես գյուղատնտեսության ոլորտներում:
Վերջին ժամանակներում սա Հայաստանի խորհրդարանական պատվիրակության երկրորդ այցն է Իսրայել: Մենք հույս ունենք. որ հաճախակի կդառնան խորհրդարանականների փոխայցերը` նպատակ ունենալով ավելի լավ ճանաչելու և հասկանալու միմյանց:
Հայաստանը, Իսրայելի նման, ունի մեծ սփյուռք` հատկապես Միացյալ Նահանգներում և Ֆրանսիայում: Հրեա ժողովրդի նման, հայերը ևս ամուր կապված են իրենց հայրենիքին: Հայկական սփյուռքը թվով շատ ավելի մեծ է, քան Հայաստանի բնակչությունն ինքնին, որը բնորոշ է նաև հրեա ժողովրդին: Մենք հույս ունենք համագործակցել ձեզ հետ՝ փոխանակելով մեր իմացությունները և փորձը սփյուռքի հետ կապերի պահպանման հարցում:
Կնեսետի, նրա անդամների և իմ անունից ջերմորեն ողջունում եմ ձեզ և ցանկանում հաճելի օրեր Իսրայելում և Երուսաղեմում: Իմ օրհնությունը ձեզ և ձեր մեծ ժողովրդին»:
