Ռուսական RIA Novosti լրատվական գործակալության փոխանցմամբ՝ Ֆրանսիայի նախագահ Ֆրանսուա Օլանդը և Գերմանիայի կանցլեր Անգելա Մերկելն այսօր Ուկրաինայի նախագահ Պյոտր Պորոշենկոյի հետ քննարկել են մինսկյան համաձայնագրերի իրագործման ընթացքը։
Այդ մասին հայտնել է Ելիսեյան պալատը։ Հայտարարության մեջ նշվում է, որ Օլանդը Պորոշենկոյին վստահեցրել է, որ Ֆրանսիան ու Գերմանիան պատրաստ են շարունակել ջանքեր գործադրել մինսկյան համաձայնագրերի ողջ փաթեթի իրագործմանը հասնելու համար։
Հեռախոսազրույցի ընթացքում Օլանդն ընդգծել է հումանիտար հարցերի շուրջ շուտափույթ առաջընթացի հասնելու անհրաժեշտությունը, ինչը մասնավորապես վերաբերում է գերիների ազատ արձակմանն ու Ուկրաինայի արևելքում ջրամատակարարման վերականգնմանը։
Օլանդը նաև հայտարարել է, որ Ֆրանսիան պատրաստ է անհրաժեշտության դեպքում ամբողջական աջակցություն ցուցաբերել կարևոր բարեփոխումների շարունակմանը, որոնք սկսել է Ուկրաինայի նախագահ Պյոտր Պորոշենկոն։
