Ամերիկյան Associated Press լրատվական գործակալության փոխանցմամբ՝ Ֆիլիպինները բանավոր նոտա է հղել Չինաստանին՝ կապված Հարավ-Չինական ծովում վիճելի կղզիներում սպառազինություն տեղակայելու հետ։
Ֆիլիպինների արտգործնախարար Պերֆերկտո Յասայը հայտարարել է, որ Մանիլան միտումնավոր է ընտրել այդ ձևը (բանավոր նոտան սովորաբար չի ստորագրվում դեսպանի կողմից).
«Մենք արձագանքել ենք Չինաստանի գործողություններին՝ հղելով բանավոր նոտա։ Ես ցանկանում եմ, որ Ֆիլիպինների ժողովուրդն իմանա, որ չնայած մենք տարածքային վեճ ունենք Չինաստանի հետ՝ մենք չենք պատրաստվում ձեռնարկել ագրեսիվ ու սադրիչ գործողություններ, որոնք միայն վատթարացնում են իրավիճակը։ Մենք չենք կարող պատերազմել Չինաստանի դեմ»։
Չինաստանը ՀՕՊ-ի միջոցներ ու հակահրթռային համակարգեր է տեղակայել Հարավ-Չինական ծովում կառուցված բոլոր 7 արհեստական կղզիներում։
