«Առաջին լրատվական»-ի զրուցակիցն է ԱԺ ՀՀԿ խմբակցության պատգամավոր Աշոտ Աղաբաբյանը (Բուռնաշ)
-Պարոն Աղաբաբյան, հաշված ամիսներ են մնացել խորհրդարանական ընտրություններին: Արդեն կա՞ որոշում, կընդգրկվեք ցուցակո՞ւմ, թե ոչ:
-Իմ առաջադրվելը կապված է բարձրագույն մարմնի առաջարկից: Եթե կառաջարկեն, իհարկե, կլինեմ, եթե չեն առաջարկի, գոնե կասեն ինչի համար, ում համար: Եվ եթե դա էլ չասեն, ես՝ որպես հիմնադիր հանրապետական կուսակցության անդամ, միևնույն է, իմ կուսակցությանն եմ պաշտպանելու: Իհարկե շատ առաջարկներ են եղել, բայց ես բոլորին մերժել եմ: ՀՀԿ-ի մեջ, իհարկե, պետության բոլոր շերտերից մարդիկ կան: Ես պարտավոր չեմ կուսակցության մեջ որոշ մարդկանց հարգեմ կամ չհարգեմ, բայց դա պետական ազգային ցեղակրոն կուսակցություն է, այդ կուսակցությանը ժողովուրդը պետք է հավատա և հարգի իմ միջոցով, մի շարք իրոք անձնավորված մարդկանց միջոցով, այսօրվա վարչապետի միջոցով, որը պարտավորություն է վերցրել հայրենիքն այս պարտքերի միջից հանելու:
Ձեր կուսակցությունից, սակայն, մինչև հիմա առաջարկություն չեք ստացել, թեև կարճ ժամանակ է մնացել:
Լսեք, հաշված օրերի վերջում հանրապետականն իր խոսքը կասի, սա ստրատեգիա է: Այսօր կուսակցությունները իրենց ցուցակներում մարդկանց են դնում, դրանով են փորձում ձայն շարել, բայց դրանք սաղ իրենց եղած-չեղածով, ժողովուրդը բոլորին լավ գիտի, և սա ժողովրդի ընտրությունն է: Հանրապետական կուսակցությունը իր՝ ժողովրդի սիրած անձերով պետք է ձայն հավաքի: Այս բոլոր կուսակցությունները պրոյեկտներ են: ՀՀԿ-ն և կարող եմ ասել ՀՅԴ-ն պրոյեկտ չեն, դրանք ազգային, պետական արժեքներով ապրող մարդիկ են: Մեր մեջ կարող են լինեն այնքան խոտաններ, էլ չասած:
–Դուք ասացիք, որ մյուս կուսակցությունները պրոյեկտներ են, իշխանությա՞ն պրոյեկտներն են:
-Ֆինանսավորողներին չեմ ճանաչում, բայց դրանք պրոյեկտներ են:
–Իսկ ինչպե՞ս եք վերաբերվում Սեյրան Օհանյանի՝ քաղաքականություն վերադառնալուն և ընդդիմադիր բևեռ ձևավորելուն պաշտոնից հրաժարվելուց հետո:
-Սեյրան Օհանյանը պետական մտածողությանը տիրապետող տղա է: Ինքն իր Հայաստանի և Ղարաբաղի համար հզոր տղա է: Ես խնդրում եմ՝ Սեյրան Օհանյանին ոչ մեկի հետ չկապեք: Ինքն ազնիվ հայ է:
-Իսկ հնարավոր է, դուք ինչ-որ կետից մտածեք նրան միանալու մասին:
-Ես ոչ մեկին միանալու խնդիր չունեմ: Ես ունեմ Հանրապետական կուսակցություն, որի միակ կենդանի հիմնադիրն եմ, ես չեմ կարող լքել իմ նավը: Եթե կխորտակվի, ես կռիս չեմ կարող դառնալ, ես այդ նավի հետ կխորտակվեմ:
-Պարոն Աղաբաբյան, այս տարի դուք ընդհանրապես չմասնակցեցիք նիստերին, վիրավորված էի՞ք ձեր կուսակցությունից…
-Ես ոչ մեկից վիրավորվելու իրավունք չունեմ, ես կարող եմ չհամաձայնել, բայց դա վիրավորանք չէ: Այսօր հին Նոր տարվա առաջին օրն է: Սա մեր պապերի Նոր տարին է և պետք է մեր պապերի կենացը խմենք: