Հայաստանում միլինավոր դոլարների ներդրում կատարած, սակայն հետագայում իր հիմնադրած ընկերությունը սնանկացված հայտնաբերած ամերիկահայ գործարար Էդմոնդ Խուդյանը օրեր առաջ Հայաստանում հանդիպել է Մաշտոցի 33-ից տուն գնած, սակայն խաբված հերթական գնորդ Լուսինե Գյուլխասյանի հետ: Լուսինե Գյուլխասյանը, ինչպես արդեն հայտնի է, իր բնակարանի գործով դատավարությամբ վերջին նիստին էր միջնորդել վկայության հրավիրել նաև գործարար Էդմոնդ Խուդյանին: Վերջինս օգոստոսի առաջին տասնօրյակում Հայաստանում էր ինչպես տուժած գնորդի հետ հանդիպելու, այնպես էլ այս պահին ՊԵԿ քննչական ծառայությունում գտնվող քրեական գործի նախաքննության ընթացքի վերաբերյալ որևէ նորություն ստանալու և փաստաբաններ Լեռնիկ Հովհաննիսյանի և Նիկոլայ Բաղդասարյանի հետ հետագա անելիքները ճշտելու համար:
Այն մասին, որ իր միջոցներով հիմնադրած ընկերությունը թալանել են ու չեն վճարել պետական հարկերը, ինչի արդյունքում Էդմոնդ Խուդյանն ու բազմաթիվ քաղաքացիներ կրել են հսկայական վնասներ, գործարարը բազմիցս է հայտարարել: Այս գործով իր և բազմաթիվ քաղաքացիների կրած վնասների մասին մեզ հետ զրույցում գործարարը նշեց, որ եթե նախկինում, երբ ինքը նոր էր հայտարարել հանցագործության մասին իր և բնակիչների համատեղ վնասները ակնհայտ չէին, ապա պետական հարկերը չվճարելու համար պետությունը հսկայական վնասներ էր կրել և դատախազությունը դեռ այն ժամանակ պետք է անհապաղ միջոցներ ձեռնարկեր ընկերության մնացած տարածքների վրա արգելանք դնելու ուղղությամբ և կանխեր մանգասարյանի կողմից ընկերության գույքի հետագա թալանը: «Եթե ինձ և մի շարք գնորդների տուժող չէին ճանաչում, ապա Հայաստանի Հանրապետությունը հաստատ տուժել էր և պետական շահը պահանջում էր կանխել Մանգասարյանի կողմից փողերի լվացման հետագա գործունեությունը, սակայն Վ. Մանգասարյանն այն ժամանակ հնարավորություն ստացավ մնացած տարածքները ևս օտարելու:
«Այս պահին ըկերության սանանկացման վերաբերյալ գործի քննությունը շարունակվում է ՊԵԿ քննչականում, հանցագործներիցՎլադիսլավ Մանգասարյանին առաջադրված է մեղադրանք և ես հույս ունեմ, որ վերջապես լուծում կստանան իմ գործով մյուս օրակարգային հարցերը: Իսկ այս պահին օրակարգային հարց է ընկերության մնացած գույքի վրա արգելանք դնելու խնդիրը, քանի որ հակառակ դեպքում ընկերությունից յուրացված տարածքները դեռևս շարունակվում են վերավաճառվել: Բացի դրանից՝ միլիոնավոր դալորների վնասներ կրելուց հետո ես մինչ օրս դատավարական կողմ չեմ, օրակարգային հարց է նաև իմ՝ տուժող ճանաչվելը, որպեսզի իրավասու լինեմ դիմումներ ներկայացնելու և գործի ընթացքին հետևելու»,- Սփյուռքահայ ներդրողների շահերի պաշտպանության նախաձեռնող խմբի հետ զրույցում նշեց գործարարը:
Նշենք նաև, որ ՀՀ Կենտրոն և Նորք-Մարաշ վարչական շրջանների ընդհանուր իրավասության դատարանում վաղը կշարունակվի գործարարի ներդրումներով կառուցված շենքից բնակարան գնած տուժած գնորդ Լուսինե Գյուլխասյանի գործով դատավարությունը: Հիշեցնենք, որ այս գործով վերջին դատական նիստում պարզվեց, որ դատահոգեբուժական կեղծ եզրակացության շնորհիվ դատարանը չի հարցաքննի Խուդյանի շենքից թալանված բնակարանի գործով գլխավոր վկային: Խոսքը վերաբերում է ներկայումս կալանավորված շինարար Վլադիսլավ Մանգասարյանի եղբայր Ռուբեն Մանգասարյանին, ով թերևս դատաքննական փուլում արդեն բացահայտված փաստերից հետո հայտնի չէ ինչ եղանակներով փաստորեն խուսափեց դատարանում հարցաքննվելուց: Բանն այն է, որ հունիսի 7-ին դատարան էր ստացվել Ռուբեն Մանգասարյանի վերաբերյալ դատահոգեբուժական փորձաքննության եզրակացությունը` խիստ կասկածելի բովանդակությամբ: Իսկ ամենակարևորն այն է, որ ըստ այդմ` դատարանում պետք է հրապարակվեն մինչդատական վարույթի ընթացքում Մանգասարյանի կողմից տրված ցուցմունքները, քանի որ հիմա նա, այսպես ասած, «ունակ չէ ճիշտ վերարտադրելու իրականությունը»:
Սփյուռքահայ գործարար Էդմոնդ Խուդյանի փաստաբան Լեռնիկ Հովհաննիսյանը այսպիսի մի փորձագիտական եզրակացություն կանխատեսելի էր համարում, քանի որ դատարանում արդեն լիովին պարզ է դարձել, որ մինչդատական վարույթի ընթացքում տրված ցուցմունքների հիմնական մասը կեղծ է եղել: Ինչ վերաբերում է կոնկրետ Ռուբեն Մանգասարյանի նախաքննական կեղծ ցուցմունքներին` դատարանում արդեն ամբողջությամբ պարզվել է, որ նրա ցուցմունքները լիովին կեղծ են և վաղուց բացահայտվել է, որ տուժած քաղաքացի Լուսինե Գյուլխասյանի բնակարանը իրականում տնօրինել է ոչ թե Ռուբեն Մանգասարյանը, այլ նրա եղբայր Վլադիսլավ Մանգասարյանը: Իսկ Ռուբեն Մանգասարյանի և Արթուր Գալստյանի միջև բնակարանի կեղծ առուվաճառք է տեղի ունեցել, իրականում այդ գործարքըտեղի է ունեցել մի կողմից` բնակարանի իրական սեփականատեր Վլադիսլավ Մանգասարյանի, մյուսկողմից` Հարթունյան ընտանիքին պատկանող «Ջի Էյջ Սթորիջ Էնթրփրայզես» ընկերությունից հայտնի Սևակ Արզարունու միջև` Վլադիսլավ Մանգասարյանի պարտքերի դիմաց:
Ի դեպ` ամբաստանյալ Էդուարդ Եսայանի պաշտպանը խնդրել է դատարանին Մանգասարյանի ցուցմունքները չդնել մեղադրանքի հիմքում, քանի որ դրանք անթույլատրելի ապացույցներ են, սակայն այդ հարցին դատարանը կանդրադառնա վճռի կայացման փուլում: Նախատեսված է, որ վաղվա դատական նիստում դատարանում վերջապես ցուցմունք կտա ամբաստանյալ Էդուարդ Եսայանը և կտա այն իրական անձանց անունները, ովքեր կանգնած են ինչպես այս, այնպես նաև մյուս տուժած քաղաքացիների բնակարանների թալանի ետևում: Դատական նիստը նշանակված է վաղը՝ ժամը 16.00-ին:
