«Հայաստանում գինեգործության ամենակարևոր հիմնախնդիրն այն է, որ մենք չունենք որակյալ խաղող: Հայաստանը միշտ կենտրոնացել է կոնյակի արտադրության վրա, դրա համար այլ սորտեր են անհրաժեշտ եղել, և ուշադրություն չի դարձվել բուն գինու արտադրությանը, իսկ կոնյակի սորտերից հնարավոր չէ գինի պատրաստել»,- պարզաբանեց Հայաստանի գինեգործների միության նախագահ Ավագ Հարությունյանը:
Ըստ նրա՝ Հայաստանում գինու համար մեկ-երկու լավ սորտ ունենք, բայց դա շատ քիչ է. և՛ սորտերի թիվն է քիչ, և՛ այդ սորտերի խաղողի այգիները:
«Հայաստանում այգիների 95 տոկոսը գյուղացիներինն է: 1991-93 թվականներին նրանք այդ այգիները պետությունից ստացել են որպես նվեր, որը Սովետական Հայաստանից էր ժառանգվել, և որոնք նախատեսված էին հիմնականում կոնյակի արտադրության համար: Գյուղացիները երբեք հնարավորություն կամ փող չեն ունեցել այգիները փոխելու: Ունեն այն, ինչ ունեցել են»,- «Առաջին լրատվական»-ին ասաց Հայաստանի գինեգործների միության նախագահը:
Նրա տեղեկացմամբ՝ նոր գործարանները հիմնում են իրենց այգիները և փորձում են այդ խնդիրը լուծել, բայց դա շատ քիչ է. 17 հազար հեկտարից՝ ընդամենը 1000 հեկտար:
Ավագ Հարությունյանի խոսքով՝ ներմուծված գինին շատ ավելի էժան է, որն ազդում է մրցակցության վրա, քանի որ Հայաստանում գինու ինքնարժեքն ավելի բարձր է, քան այն երկրներում, որտեղից ներկրվում է այն՝ նույնիսկ հաշվի առնելով ճանապարհային, մաքսային ծախսերը:
Ավագ Հարությունյանի կանխատեսմամբ՝ եթե հանկարծ Ռուսաստանը որոշի փակել սահմանները հայկական գինու և կոնյակի առջև, գինու առումով էապես ոչինչ չի փոխվի, քանի որ 5-6 միլիոն լիտր գինի է արտադրվում, որից մեկ միլիոն լիտրն է արտահանվում: Հայկական գինու սպառման հիմնական շուկան Հայաստանն է: Իսկ կոնյակագործների մոտ լուրջ խնդիր կառաջանա, որոնք, ըստ Ավագ Հարությունյանի, ուղղակի կսնանկանան, որովհետև աշխատում են մեծ վարկային ռեսուրսներով, և կոնյակի արտադրության 93-95 տոկոսն ուղղված է ռուսական շուկա:
«Այդ դեպքում կոնյակագործները կփորձեն այլ շուկաներ որոնել, այդ ընթացքում սլաքները կուղղեն ներքին շուկա և կսկսեն զբաղվել գինու արտադրությամբ: Գինու շուկան կպայթի, որովհետև նրանք շատ հարուստ են, ներքին շուկայում առանց այն էլ լճացում է և շատ լուրջ մրցակցություն: Դա միանշանակ կբերի աղետի, համենայնդեպս՝ մեկ-երկու տարի, որից հետո գինեգործները կսկսեն այլընտրանքային շուկաներ որոնել՝ ի դեմս Չինաստանի, Եվրոպայի և ԱՄՆ-ի հայկական համայնքի: 3-4 տարի անց գինու շուկան լրիվ կվերականգնվի, բայց կոնյակի շուկան՝ երբեք, կոնյակի շուկան ուղղված է միայն դեպի Ռուսաստան»,- հավաստիացրեց Ավագ Հարությունյանը:
Նրա խոսքով՝ հայկական գինու շուկան բավականին դինամիկ է ու աճող: Ըստ նրա՝ հայերը գինի շատ չեն խմում, բայց աստիճանաբար այդ ուղղությամբ միտում է նկատվում:
Լուսանկարը՝ Armenpress-ի
