Թուրքիայի վարչապետ Ռեջեփ Թայիփ Էրդողանը հայտարարել է, որ «Քուրդիստանի աշխատավորական կուսակցության» ղեկավարությունը չի կատարել Թուրքիայի տարածքից իր գրոհայիններին դուրս բերելու պարտավորությունը, որի մասին պայմանավորվածություն կար:
«Նրանք չեն կատարել իրենց խոստումը: Երկրի տարածքից դուրս են եկել քրդերի միայն 20 տոկոսը, հիմնականում՝ ծերեր, կանայք և երեխաներ: Դրանից բացի, գրոհայինները չեն զինաթափվել: Նրանց, ովքեր պատրաստվում են հարձակվել, մեր ուժային կառույցները չեն ասի «Բարով եք եկել», այլ կանեն այն, ինչ պետք է անեն»,- Էրդողանի խոսքերը մեջբերում է Vatan հրատարակչությունը: Այս հայտարարությունը Թուրքիայի վարչապետն արել է Թուրքմենստան կատարած այցի ժամանակ:
