«Հարգելի պարոն նախագահ, թույլ տվեք ներկայանալ: Իմ անունն է Էլվիս Փրեսլի: Ես հիանում եմ Ձեզնով և մեծ հարգանքով եմ վերաբերվում Ձեր աշխատանքին»,- այսպես է սկսվում նամակը, որը դարձել է Սպիտակ տանը տեղի ունեցած հավանաբար ամենատարօրինակ հանդիպումներից մեկի պատճառը, գրում է Թոմ Լեոնարդը The Daily Mail-ում:
Խոսքn Էլվիս Փրեսլիի նամակի մասին է՝ ուղղված Ռիչարդ Նիքսոնին, որում երաժիշտը նախագահից խնդրել է իրեն դարձնել դաշնային գործակալ:
Ամեն ինչ սկսվել է 1970 թ. դեկտեմբերին, երբ ռոքնռոլի արքայի հայրն ու կինը սկանդալ էին բարձրացրել՝ նրան մեղադրելով փողն աննպատակ վատնելու մեջ: Վիճաբանությունից հետո Էլվիսը մեկնել էր մոտակա օդանավակայան, մի քանի թռիչքներ իրականացրել երկրի ներսում և մեկնել Վաշինգտոն: Նրան մոտ կանգնած մարդկանց փոխանցմամբ՝ Էլվիսը փորձել է գտնել իրավապահ մարմինների տարբերանշանների իր հավաքածուի պակասող ցուցանմուշը՝ Թմրանյութերի և վտանգավոր դեղամիջոցների բյուրոյի գործակալի նշանը:
Նույն չվերթով մայրաքաղաք է մեկնելիս է եղել նաև սենատոր Ջորջ Մյորֆին, որին Էլվիսը պատմել է իր որունումների մասին: Մի քիչ մտածելով՝ սենատորը խորհուրդ է տվել նրան նամակ գրել նախագահ Նիքսոնին և առաջարկել իր ծառայությունները թմրանյութերի դեմ պայքարում:
«Ես կարող եմ մեծ օգուտներ բերել և կբերեմ, եթե դառնամ դաշնային գործակալ՝ լայն լիազորություններով»,- գրել է նա իր ուղերձում և հավելել, որ ուսումնասիրել է թմրանյութերից կախվածության հարցը, ուղեղի լվացման մեթոդները, որոնք օգտագործում են կոմունիստները:
Վայրէջք կատարելով Վաշինգտոնում՝ Փրեսլին անձամբ նամակը տարել է Սպիտակ տան դարպասների մոտ, և շուտով Նիքսոնի օգնականներն արդեն քննարկել են՝ ինչպես վարվել ստեղծված իրավիճակում:
Սկզբում կասկածամիտ «Խորամանկ Դիկը» ռոք աստղի հետ հանդիպելու ցանկություն չի ցուցաբերել, սակայն նախագահի մոտ խորհրդականներից մեկը համոզել է նրան, որ Փրեսլիի հետ հանդիպումը կարող է օգուտ բերել:
Հանդիպումը կայացել է նույն օրը:
«Դու, իհարկե, շատ վայրի ես հագնվում» ,- ասել է Նիքսոնը՝ տեսնելով Փրեսլիին, ով իր հերթին պատասխանել է՝ «Պարոն նախագահ, Դուք ունեք ձեր շոուն, ես՝ իմը»:
Ի զարմանս Սպիտակ տան ղեկավարի՝ նրա հետ զրուցելիս երգիչն անմիջապես սկսել է բողոքլ The Beatles-ից՝ խմբին մեղադրելով հակաամերիկյան տրամադրություններ ստեղծելու մեջ: Վերջիվերջո, Նիքսոնը կարգադրել է Փրեսլիի համար պատրաստել պատվավոր գործակալի շքանշան՝ նրան տալով լայն լիազորություններ:
Մինչև հիմա չեն դադարում վեճերն այն մասին, թե արդյոք ռոքնռոլի արքան իրականում եղե՞լ է Նիքսոնի կողմնակիցը, թե՞ ուղղակի ձևացել է աջ պահպանողական՝ ցանկալի «պլաստիկե կտորը» ստանալու համար:
Տարիներ անց Նիքսոնի խորհրդականն ասել է. «Նա մեզ խաբեց: Սակայն դա զվարճալի էր»:
