Լրատվամիջոցների ուշադրության կենտրոնում շարունակում է մնալ օգոստոսի 3-ին Երուսաղեմի հայոց պատրիարք Նուրհան արքեպիսկոպոս Մանուկյանի՝ Ն.Օ.Տ.Տ. Ամենայն հայոց կաթողիկոս Գարեգին Բ-ին ուղղված նամակը, որտեղ պատրիարքը տարակուսանք էր հայտնել Հայ Առաքելական եկեղեցու Ֆրանսիայի թեմի առաջնորդ Նորվան արքեպիսկոպոս Զաքարյանի հրաժարականի վերաբերյալ Գերագույն հոգևոր խորհրդի հաղորդագրության կապակցությամբ:
Մինչև այս պահը Մայր Աթոռ Սուրբ Էջմիածինը չի արձագանքել պատրիարքի նամակին՝ բացի Մայր Աթոռի տեղեկատվական համակարգի ղեկավար տեր Վահրամ քահանա Մելիքյանից, ով մեկնաբանել էր, թե կաթողիկոսը կարճատև հանգստի է մեկնել, և անհրաժեշտ պարզաբանումներն ու մեկնաբանությունները կտրվեն առաջիկայում:
Երեկ մի խումբ հասարակական կազմակերպություններ հանդես են եկել հայտարարությամբ, թե պատրիարքի նամակի հանրայնացումը սխալ է, և չի ծառայում եկեղեցու հզորացմանը:
«Առաջին լրատվական»–ի հետ զրույցում Արիս արքեպիսկոպոս Շիրվանյանը, պատախանելով հարցին, թե ինչ է մտածում Երուսաղեմի հայոց պատրիարքությունը ստեղծված իրավիճակի մասին, նշեց, որ այս հարցի վերաբերյալ չի ուզում կարծիք հայտնել և որևէ մեկնաբանություն տալ։ «Որովհետև երկուսն էլ իմ հոգևոր պետերն են։ Այնպես որ հարցը իրենց միջև պետք է կարգադրվի»,- նշեց նա:
Հարցին՝ արդյոք պատրիարքարանը պատասխան նամակ ստացե՞լ է Ն.Օ.Տ.Տ. Ամենայն հայոց կաթողիկոս Գարեգին Բ-ից, Արիս սրբազանը պատասխանեց, որ չի ստացել:
Նա նշեց, որ պատրիարքարանում բնականոն վիճակ է, յուրաքանչյուրն իր գործերով է զբաղված. «Իհարկե, մտահոգ ենք այս բանավեճի հարցով, ներկայի և ապագայի հարցով»:
Թեև կաթողիկոսից նամակ Երուսաղեմի պատրիարքը դեռ չի ստացել, սակայն Մայր Աթոռից հինգ եպիսկոպոսների ստորագրությամբ նամակ են ուղարկել Երուսաղեմի հայոց պատրիարք Նուրհան արքեպիսկոպոս Մանուկյանին: Նամակի բովանդակության մասին Արիս սրբազանն ասաց. «Թույլ տվեք չմեկնաբանել. դա պատրիարքի իրավասության մեջ մտնող հարց է»։
