Արդյոք առաջիկայում ՀՀԿ-ին հակակշիռ նոր ուժ կստեղծվի՞: Քաղաքական գործիչ Գուրգեն Եղիազարյանի կարծիքով՝ այսօր, ցավոք, ՀՀԿ-ն ներկայացնելու բան չունի հայ ազգին: «Ինչին ձեռք տվեցին՝ ավերեցին, մեծ միլիարդների պարտք են թողել մեր սերունդներին: Մեր սոված- ծարավ երկրի ընդերքը ո՞ւր է, ո՞վ է լափում, որ շան որդու գրպանն է այդ ամենը գնում: «Առաջ Հայաստանը» սրընթաց հետ գնաց, «Ապահով Հայաստանից» ճամպրուկներով փախչում են մարդիկ, այնպես որ՝ երրորդ ուժ պետք է ստեղծվի»,- ասաց նա՝ հավելելով, որ իրականում կստեղծվի ՀՀԿ շտրիխ:
Ընդդիմությունից հիասթափված հանրության համար էլ Գուրգեն Եղիրազարյանը հավաստիացրեց, որ աշնանը չի հիասթափվի: Իսկ թե որ ճամբարում է հիմա ինքը՝ ասաց, որ այն ճամբարում է, որը դեմ է Սերժ Սարգսյանին:
Հանրապետական Լեռնիկ Ալեքսանյանը, սակայն, դեմ է ծայրահեղ գնահատականներին, քանի որ, ըստ նրա, եթե այս երկրում ուզում ենք լավ բան լինի, ուրեմն ծայրահեղ աստիճանները, հեղափոխությունները, ոչ մի լավ բանի չեն հանգեցնի: «Եղավ հեղափոխություն՝ հրեշտակնե՞ր եք բերելու»,- ասաց նա Գուրգեն Եղիազարյանին:
Նա նշեց, որ հիմա հրապարակում ոչ քաղաքական ցույց են անում. «Կարևորը՝ այսօր մեր երիտասարդությունը կարծում է, որ ինքը ուժ է և կարող է խնդիր լուծվել: Սա արդյոք իշխանությունների առաջընթացը չէ՞: Այսօր քսան տարվա կեղտը չպետք է փորձել բերել-բարդել այս իշխանությունների վրա: Պետք է գործ անել: Այսօր ընդդիմությունը չի կարողանում իր միջի խնդիրները լուծել, հետո էլ իշխանափոխություն է ուզում անել և հրեշտակներին բերի նախագահ»,- ասաց նա:
Գուգեն Եղիազարյանը դիմեց Լեռնիկ Ալեքսանյանին, թե ինչպե՞ս անենք, որ ազատվենք Տիգրան Սարգսյանից: «Նա դրել է, տնտեսության հերն անիծել, մաման լացացրել է, յոթանասուն տոկոս աղքատություն է թողել, և կիթառը ձեռքին նվագում է»,- ասաց նա՝ հիշեցնելով մի անեկդոտ, երբ հայրը տեսնում է՝ բոլոր առարկաներից որդին երկուս է ստանում, միայն երգից է հինգ ստանում, դնում-սատկեցնում է, ասում՝ շան տղեն էսքան երկուսից հետո դեռ երգում էլ է:
Լեռնիկ Ալեքսանյանն էլ ասաց, որ Տիգրան Սարգսյանը ինտելիգենտ է, տնտեսագետ, ավելի լավ չի՞ կիթառ նվագի:
Լուսանկարը` PanARMENIAN Photo-ի
