Թուրքական Habertürk լրատվական պորտալի փոխանցմամբ՝ Անկարայում Ռուսաստանի դեսպան Անդրեյ Կառլովի մարդասպանը՝ թուրքական ոստիկանության նախկին աշխատակից Մևլյութ Մերթ Ալթընթաշն է։
Ընդգծվում է, որ նա ոստիկանության շարքերից հեռացվել է հուլիսի 15-ին տեղի ունեցած ռազմական հեղաշրջման փորձի հետաքննության շրջանակներում։
Լրատվամիջոցի տվյալներով՝ 22-ամյա տղամարդը հանդիսացել է FETÖ (իսլամական քարոզիչ Ֆեթհուլլահ Գյուլենի) ահաբեկչական կազմակերպության անդամ։
Նշվում է, որ տղամարդը ցուցահանդեսի շենք, որտեղ ելույթ է ունեցել ռուս դեսպանը, մուտք է գործել իբրև ոստիկան, սակայն նրա ներկայացրած վկայականը եղել է կեղծ։ Ռուս դեսպանի սպանությունից հետո խստացվել են Անկարայում Ռուսաստանի դեսպանատան անվտանգության միջոցառումները։
