Ռուսաստանը ճանաչել է Լիբիայի անցումային Ազգային խորհուրդը՝ որպես Լիբիայի խնդրի կարգավորման լիիրավ բանակցային կողմ: Այս մասին այսօր հայտարարել է Ռուսաստանի արտաքին գործերի նախարար Սերգեյ Լավրովը:
«Երեկ ես հանդիպել եմ լիբիական ընդդիմության ներկայացուցիչ Աբդ Ալ-Ռահման Շալքամի հետ: Զրույցի ընթացքում նա հատուկ շեշտել է, որ Ազգային անցումային խորհուրդը չի խնդրում իրեն ճանաչել որպես Լիբիայի ժողովրդի միակ օրինական ներկայացուցիչ, այլ խնդրում է ճանաչել այդ խորհուրդը որպես Լիբիայի ապագայի վերաբերյալ բանակցությունների լեգիտիմ գործընկեր»,- Լավրովի խոսքերն է փոխանցում RIA-Novosti գործակալությունը:
Հիշեցնենք, որ վերջին շրջանում Ռուսաստանի դիվանագետները փորձում են ավելի մեծ դերակատարություն ստանձնել ներլիբիական կարգավորման հարցում: Անցյալ շաբաթ Մոսկվա էին այցելել Մուամար Քադաֆիի ներկայացուցիչները:
