Business Грузия-ի փոխանցմամբ, քաթարցի գործարարները պատրաստվում են ներդրումներ կատարել Վրաստանի գյուղատնտեսական ոլորտում: Երեկ նրանք Վրաստանում հանդիպել են Գյուղատնտեսության նախարար Բակուր Կվեզերելիի հետ:
Հանդիպման ժամանակ կողմերը քննարկել են ներդրումների կատարմանն ու իրենց հետագա համագործակցության հեռանկարներին առնչվող խնդիրներ:
Կվեզերելին հայտարարել է. «Մեզ անհրաժեշտ են օտար ներդրումները, որոնք հնարավորություն կընձեռեն նոր աշխատատեղեր բացելու և գյուղատնտեսական ոլորտում առկա տարբեր խնդիրները լուծելու համար»:
Նշվում է, որ քաթարցի գործարարները 6 ամիս շարունակ ուսումնասիրել են Վրաստանի ներդրումային միջավայրը:
Հիշեցնենք, որ գյուղատնտեսությունը, էներգետիկ ու զբոսաշրջային ոլորտների հետ մեկտեղ, գտնվում է Վրաստանի նախագահ Միխեիլ Սաակաշվիլիի ուշադրության կենտրոնում, ով օրեր առաջ հայտարարեց, թե Վրաստանի ագրարային ոլորտի պոտենցիալն այնպիսին է, որ այն կարող է կրկնապատկվել ու եռապատկվել, ոչ մի թիզ անմշակ հող չպետք է մնա, և երկիրը պետք է կերակրի ինքն իրեն:
