Թուրքիան բանակցություններ է վարում Ռուսաստանի և Իրանի հետ՝ խնդիրները հաղթահարելու համար, որոնք խոչընդոտում են Սիրիայի Հալեպ քաղաքից բնակիչների տարհանմանը։ Ինչպես հաղորդում է RIA Novosti-ն, այս մասին հայտարարել է Թուրքիայի ԱԳ նախարար Մեվլյութ Չավուշօղլուն Անկարայում մամլո ասուլիսին։
ԱԳ նախարարի խոսքով՝ արդեն իրականացվել է հումանիտար շարասյան վեց տուր, իսկ Հալեպից դուրս է բերվել 7.5 հազար մարդ։ Չավուշօղլուն չի հստակեցրել՝ ինչու է դադարեցվել տարհանումը։
«Երեկ որոշ ուշացումով դուրս է եկել առաջին շարասյունը։ Մինչ այդ 6 տուր է կատարվել։ Ինչո՞ւ այդքան քիչ ավտոբուս կա։ Բանը կայանում է նրանում, որ այնտեղ ճանապարհը նեղ է։ Որպեսզի մեծացնենք տրանսպորտի քանակությունը, մենք աշխատում ենք այդ ուղղությամբ։ Առաջնահերթությունը տվել ենք հիվանդներին, վիրավորներին, երեխաներին և կանանց»,-հայտարարել է Չավուշօղլուն։
Նրա խոսքով՝ տարհանումը դեռևս չի ավարտվել, դեռևս շատ մարդիկ ցանկանում են հեռանալ Հալեպից։
Սիրիայում հակամարտող կողմերի հաշտեցման ռուսական կենտրոնը հաղորդել է, որ ավարտվել է զինյալների և նրանց ընտանիքների տարհանումը Հալեպի արևելյան շրջաններից։
