Պուտինը պատրաստ էր ԼՂ հարցում հօգուտ Ադրբեջանի քայլեր անել, եթե Ադրբեջանն ընդառաջ գար իր պահանջներին: Այս մասին այսօր «Առաջին լրատվական»-ի հետ զրույցում ասաց Գլոբալիզացիայի և տարածաշրջանային համագործակցության վերլուծական կենտրոնի խորհրդի նախագահ, քաղաքագետ Ստեփան Գրիգորյանը` անդրադառնալով երեկ ՌԴ նախագահ Վլադիմիր Պուտինի՝ Ադրբեջան կատարած պաշտոնական այցին:
Քաղաքագետը նշեց, որ Ռուսաստանի համար կարևոր է զարգացնել իր հարաբերություններն Ադրբեջանի հետ, քանի որ Ադրբեջանն իրականացնում է մի քանի ծրագրեր, որոնք այլընտրանքային են, շրջանցում են ՌԴ-ին, իսկ ՌԴ-ն փորձում է փոխել իրերի դրությունը: Ըստ Ստեփան Գրիգորյանի՝ ՌԴ-ի համար երկու խնդիր էր կարևոր:
«Առաջինն էներգետիկ ոլորտի խնդիրներն են, այսինքն՝ այնպես անել, որ Ադրբեջանը թուլացնի իր այլընտրանքային ծրագրերը, և երկրորդ խնդիրը, որը կարևոր էր ՌԴ-ի համար, կապված էր ԱՊՀ երկրների շրջանակներում ընթացող ինտեգրացիոն գործընթացների հետ, որոնց մեջ ընդհանրապես չկա Ադրբեջանը:
Որոշ ժամանակ առաջ ՌԴ-ն դիմեց Ադրբեջանին, որ նա դառնա ՀԱՊԿ անդամ, սակայն Ադրբեջանը մերժեց: Հիմա այցելության ժամանակ, կասկած չունեմ, որ այս հարցերը շոշափվել են, բայց ՌԴ-ն Ադրբեջանում հստակ պատասխան ստացավ՝ Ադրբեջանն իր սուվերենությունը չի վաճառում:
Ադրբեջանի համար էներգետիկ այլընտրանքային ոլորտն իր սուվերենության հարցն է, և երկրորդ՝ Ադրբեջանը ոչ մի հետաքրքրություն չունի ԱՊՀ երկրների շրջանակներում ինտեգրացիոն գործընթացներին մասնակցելու հարցում: Այդ երկու պատասխանը ՌԴ-ն ստացավ Ադրբեջանում»,- մեկնաբանեց Ստեփան Գրիգորյանը:
Անդրադառնալով Ադրբեջանում ՌԴ նախագահի հայատարարությանը ԼՂ հակամարտության մասին՝ ասաց, որ դա էլ ՌԴ պատասխանն էր Ադրբեջանին: Վերլուծաբանի խոսքով՝ ՌԴ-ն հասկանում էր, որ Ադրբեջանը մի բան խնդրելու է իր պահանջների դիմաց, ուստի ՌԴ-ն պատրաստ էր Ղարաբաղի հարցում քայլեր անել ի օգուտ Ադրբեջանի,բայց, ի զարմանս ՌԴ-ի, Ադրբեջանն իր պահանջներին բացասական պատասխան տվեց:
«Ուստի Պուտինի հայտարարությունը պատասխանն էր այն Ադրբեջանին նրա այն պատասխանի, որը տվեց ՌԴ-ին: Եթե Պուտինն ասում է, որ ԼՂ հակամարտությունը պետք է կարգավորվի քաղաքական ճանապարհով, նշանակում է, որ ՌԴ քաղաքականությունը Ղարաբաղի մասով չի փոխվելու: Հարձակողական զենքի վաճառքն Ադրբեջանին ՌԴ-ի նվերն էր Ադրբեջանին, որպեսզի Ադրբեջանն էլ պատրաստ լինի ՌԴ-ին ընդառաջ քայլեր կատարել, զենքի գործարքը նպատակ ուներ դրական ֆոն ստեղծել այս այցի և Պուտինի առաջարկների համար: Բայց փորձը ցույց է տալիս, որ Ադրբեջանն իսկապես չի սակարկում իր անկախությունը, թեև Ադրբեջանը միշտ ասում էր, որ ԼՂ հակամարտության կարգավորման բանալին ՌԴ ձեռքում է, այդ դեպքում ո՞ւմ վրա է հույսը դնում Ադրբեջանը: Փաստորեն Ադրբեջանում կարծիք կա, որ առանց ՌԴ-ի էլ իրենք կարող են լուծել ԼՂ խնդիրը, չեն ցանկանում, որ ՌԴ-ն խաբի իրենց, քանի որ գիտեն՝ ինչ է կատարվում Հայաստանում, ուստի չի բացառվում, որ մերժեցին ՌԴ այդ առաջարկը հենց այն պատճառով, որ կարծում են, թե այլ ճանապարհով կլուծեն հակամարտությունը»,- վերլուծեց քաղաքագետ Ստեփան Գրիգորյանը:
Հիշեցնենք, որ երեկ ադրբեջանում ռուս-ադրբեջանական բանակցությունների ավարտին Ռուսաստանի նախագահը հայտարարեց. «Իհարկե, բանակցությունների ընթացքում մենք անդրադարձանք նաև հրատապ միջազգային խնդիրներին, բնականաբար չշրջանցեցինք նաև Լեռնային Ղարաբաղի հարցը: Ուզում եմ հատուկ ընդգծել` Ռուսաստանը ակտիվորեն նպաստում է հարցի կարգավորմանը, որը հնարավոր է բացառապես քաղաքական միջոցներով»:
