Վանաձորում դեկտեմբերի 13-ին չկայացավ քաղաքապետ Մամիկոն Ասլանյանի հրավիրած արտահերթ նիստը։ Ինչպես նախորդ նիստի ժամանակ, այս անգամ ևս պատճառն ընդդիմադիր խմբակցությունների՝ «Լուսավոր Հայաստան»-ի, «Բարգավաճ Հայաստան»-ի, «Հայկական Վերածնունդ»-ի բոյկոտն է։
«Լուսավոր Հայաստան» խմբակցության ղեկավար Քրիստ Մարուքյանը նշել է, որ իրենց կուսակցությունը դիմելու է ՀՀ կառավարությանը՝ Վանաձորի ավագանին լուծարելու պահանջով։Նրա խոսքերով՝ եթե երեք ամիս անընդմեջ ավագանին նիստեր չի գումարում, ապա դա հիմք է, որպեսզի կառավարությունը ավագանու լուծարման որոշում կայացնի։ Ըստ Մարուքյանի՝ եռամսյա ժամկետը լրանում է հունվարի 10-ին։
Ի դեպ, ՏԻՄ օրենքի՝ Վանաձորի և Գյումրու վերաբերյալ առանձին կարգավորման օրենքի 69-րդ հոդվածը նշում է, որ երեք ամիս անընդմեջ ավագանու նիստ չկայանալու դեպքում կառավարությունը կարող է ավագանին լուծարելու որոշում կայացնել։ Եվ փաստորեն պարտադիր չէ, որ կառավարությանը նման պահանջով դիմեն ավագանու անդամների մեծամասնությունը։ Ինչպես «Առաջին լրատվական»-ի հետ զրույցում պարզաբանեց «Լուսավոր Հայաստան» կուսակցության խորհրդի նախագահ Էդմոն Մարուքյանը՝ նույնիսկ առանց որևէ մեկի դիմելու էլ կառավարությունը կարող է ինքնուրույն այդ որոշումը կայացնել․ «Հիմա մենք դիմելու ենք, որ կայացնի այդ որոշումը»։
Լոռու նախկին մարզպետ Վիգեն Խաչատրյանը մեզ հետ զրույցում նշեց, որ ստեղծված իրավիճակի լավագույն լուծումը կլիներ այն, եթե քաղաքապետ Մամիկոն Ասլանյանը ինքը հրաժարական տար․ «Ճգնաժամը հաղթահարելու միակ ելքը սա եմ տեսնում, նա պետք է հրաժարական տա և նոր ընտրությունների հնարավորություն ստեղծի»,- ասաց Խաչատրյանը։
Դիտարկմանը, թե Հայաստանի երրորդ խոշոր քաղաքում նախընտրական այս շրջանում հանրապետական քաղաքապետի հրաժարականը արդյո՞ք ՀՀԿ-ի համար ընդունելի կլինի, և սա չի՞ նշանակի դիրքերի զիջում, Վիգեն Խաչատրյանն արձագանքեց․ «Պարտություն կա, որ հաղթանակից վեր է։ Եվ ընդհանրապես կարծում եմ, որ սա պարտություն չէ, սա հաղթանակ կլինի Հանրապետական կուսակցության համար։ Ոչ ոքի ուսադիրները չեն պոկվի, ստեղծված ճգնաժամը մի կերպ պետք է հանգուցալուծվի, քաղաքը պետք է զարգանա, անընդմեջ այս իրավիճակը չի կարող շարունակվել»։
Մինչ այս պահը փակ գաղտնի քվեարկությամբ քաղաքապետ դարձած Մամիկոն Ասլանյանն երկու անհաջող փորձ է արել նիստ անցկացնելու համար։ Թեպետ ավագանու չորս անդամներ խախտել էին հուշագրով ձեռք բերված պարտավորությունը և քվեարկել հանրապետական թեկնածուի օգտին, այժմ նիստերին չեն ներկայանում։ Կհաջողվի՞ արդյոք մինչև սահմանված ժամկետի ավարտը նիստ հրավիրել՝ քվորում ապահովելով, պարզ կդառնա առաջիկա մեկ ամսվա ընթացքում։
Լուսանկարը՝ Photolure-ի
