«Այն պատգամավորները, ովքեր հարակից ատրիբուտներին զուգահեռ ունեցել են նաև պատգամավորի մանդատը, պետք է երկար մտածեն` այդ լրացուցիչ ատրիբուտը` մանդատը իրենց պե՞տք է, թե՞ լրացուցիչ գլխացավանք է դառնալու իրենց գլխին»,- խորհրդարանում նոր կանոնակարգ օրենքի քննարկման ժամանակ ասաց ԲՀԿ խմբակցության ղեկավար Նաիրա Զոհրաբյանը:
Պատգմավորի դիտարկմամբ՝ կանոնակարգ օրենքը երկրորդ ընթերցման է ներկայացվել փոփոխություններով, սակայն իրենց մի սկզբունքային առաջարկ չի ընդունվել, այն է` բացասական եզրակացություն ստացած նախագիծը հեղինակը խորհրդարանում ներկայացնելու համար պետք է պատշաճ ժամանակ ստանա, ոչ թե ընդամենը 3 րոպե, ինչպես ամրագրված է նախագծում. «Սա նշանակում է, որ ասում եք, թե ձեզ էլ գալըչկայի համար ձայն տվեցինք, մի բառ ասելու սերիայից է: Տվեք հնարավորություն, որ նախագծի մասին հեղինակը ներկայացնի իր կարծիքը»:
Նաիրա Զոհրաբյանն անդրադարձավ իրենց այն առաջարկին, որ խմբակցությունից դուրս եկող պատգամավորը չպետք է օգտվի խմբակցություններին տրված լիազորություններից, հատկապես նրանք, որոնք դուրս գալուց հետո վարկաբեկում են այդ խմբակցությանը: «Ժողովուրդն ընտրում է ոչ թե այս կամ անձին, այլ կուսակցության լիդերին և կուսակցության գաղափարախոսությունը: Բերեմ մեր օրինակը. թե 2007թ.-ին, թե 2012թ.-ին, քաղաքացիներն իրենց ձայները տվել են Գագիկ Ծառուկյանին և մեր կուսակցության նախընտրական ծրագրին, եթե որևէ մեկ ուրիշը կարող է ասել` հենց իրեն են ձայն տվել, այդ գնահատականը ազնիվ չեմ համարում:
Իհարկե, նապոլեոնիզմը և բոնապարտիզմը մեր քաղաքական դաշտում շատ լուրջ շեղում է, նույնիսկ հոգեբուժության մեջ այն անբուժելի է և խորանալու և անդառնալի գործընթացի վերածելու հակում ունի: Բայց հայտնի է, որ ընտրողը ձայնը տալիս է կուսակցության թրենդ դարձած անձին և նախընտրական ծրագրին: Այն գործիչները, որոնք հետագայում գտնում են, որ իրենց վեհ գաղափարները չեն համընկնում խմբակցության և կուսակցության գաղափարների հետ, պետք է վայր դնեն կուսակցության և խմբակցության կողմից ստանձնած պարտականությունները»,- նշեց Ն. Զոհրաբյանը:
