Թուրքական Sabah թերթը սենսացիոն հայտարարություն է տարածել, ըստ որի` Թուրքիայում ահաբեկչական հռչակված և արգելված «Քրդստանի աշխատավորական» կուսակցությունը (PKK) կապված է «էրգենեկոն» ահաբեկչական կազմակերպության վերնախավի հետ.
«Այս տարվա ապրիլին Հյուսիսային Իրաքում կայացել է PKK-ի և «էրգենեկոն»-ի ներկայացուցիչների հանդիպումը: Նրանք եկել են միացյալ եզրահանգման, որ անհրաժեշտ է հունիսի 12-ին կայանալիք խորհրդարանական ընտրությունների նախաշեմին Թուրքիայում խափանարար գործողություններ իրականացնել և ճնշում գործադրել ընտրողների վրա:
Կողմերը համաձայնել են աջակցել PKK զինյալների` Թուրքիա ներթափանցելուն, որից հետո քուրդ զինյալները պետք է ցրվեին երկրի տարածքով մեկ և արյունալի ակցիաներ կազմակերպեին: Դա մասնավորապես վերաբերում է Թուրքիայի արևմտյան շրջաններին:
Այժմ PKK-ն ու «էրգենեկոն»-ը կոորդինացնում են իրենց նախապես համաձայնեցրած գործողությունները»:
Հիշեցնենք, որ «Էրգենեկոն»-ը քեմալիստական-ծայրահեղական ուղղության գաղտնի կազմակերպություն է, որի անվանումը ծագում է Էրգենեկոն առասպելական տեղանունից, որտեղից ծնունդ է առել թուրք ժողովուրդը: «Էրգենեկոն»-ի անդամների մեծամասնությունը Թուրքիայի զինված ուժերի և անվտանգության ծառայության աշխատակիցներ են:
Այս կազմակերպությունը մեղադրվում է բազմաթիվ սպանությունների նախապատրաստման և դրանց արդյունքում ստեղծված քաոսի շնորհիվ հեղաշրջման նախադրյալներ ստեղծելու մեջ: Գործող իշխանությունները մեղադրվելու էին իրավիճակին տիրապետելու անկարողության մեջ: Փաստորեն, «Էրգենեկոն»-ի հիմնական նպատակը Թուրքիայի Հանրապետության հիմնադիր Մուսթաֆա Քեմալ Աթաթուրքի կողմից կանխորոշված՝ Թուրքիան որպես աշխարհիկ երկիր պահելն էր:
Թուրք ընդդիմադիրների կարծիքով, «Էրգենեկոն»-ի գործը հորինել են իշխանությունները` այլակարծների հետ հաշվեհարդար տեսնելու նպատակով:
