ԱՄՆ Կոնգրեսի Վերին պալատին է ներկայացվել մի բանաձև, որով քննարկվում է Լիբիայում ամերիկյան զորքերի մասնակցության հետագա ընթացքը: Այս մասին հաղորդում է France Presse գործակալությունը:
Հայտնի է, որ փաստաթուղթը դեմոկրատների և հանրապետականների համատեղ աշխատանքի արդյունք է: Դա Սենատին են ներկայացրել դեմոկրատ Ջոն Քերրին և նրա հանրապետական գործընկեր Ջոն Մաքքեյնը:
Թեպետ բանաձևի ապագան դեռ պարզ չէ, սակայն այն փաստը, որ բանաձևի մշակմանը մասնակցել են երկու կուսակցությունները, նշանակում է, թե քիչ հավանական է, որ այն կտապալվի: Առանց այս փաստաթղթի էլ Օբաման հնարավորություն ունի երկարացնելու այդ օպերացիային ԱՄՆ զորամիավորումների մասնակցությունը, սակայն Կոնգրեսի բանաձևը լրացուցիչ աջակցություն է ապահովում երկրի ներսում:
Բանաձևի ընդունման անհրաժեշտությունն առաջացել է, քանի որ անցել է օրենքով սահմանված 60-օրյա ժամկետը, երբ Օբաման կարող էր պատերազմ վարել Լիբիայում: Այդուհանդերձ, Օբամայի վարչակազմում ասում են, որ եթե բանաձևը չընդունվի, ԱՄՆ զորքերը կմասնակցեն այդ օպերացիային, քանի որ սա ոչ թե լայնամասշտաբ պատերազմ է, այլ ռազմական գործողություններ, որոնք իրականացվում են ՄԱԿ-ի բանաձևի համաձայն: